پاک افغان سرحد سے دراندازی کی کوشش ناکام، خارجی کمانڈر سمیت 4 دہشت گرد ہلاک

باجوڑ: سیکیورٹی فورسز نے پاک افغان سرحد کے قریب خوارج کی دراندازی کی کوشش ناکام بنا دی۔ کارروائی کے دوران اہم خارجی کمانڈر امجد عرف مزاحم سمیت چار دہشت گرد ہلاک ہوگئے۔

آئی ایس پی آر کے مطابق امجد، خارجی رہنما نور ولی کا نائب اور رہبری شوریٰ کا سربراہ تھا۔ اس کے سر کی قیمت 50 لاکھ روپے مقرر تھی۔ امجد افغانستان میں رہ کر پاکستان کے خلاف دہشت گرد سرگرمیوں میں ملوث تھا۔

ترجمان پاک فوج کے مطابق خوارج افغانستان کی سرزمین کو پاکستان میں دہشت گردی کے لیے استعمال کر رہے ہیں۔ پاکستان نے ایک بار پھر مطالبہ کیا ہے کہ افغان سرزمین کو پاکستان مخالف سرگرمیوں کے لیے استعمال نہ ہونے دیا جائے۔

آئی ایس پی آر نے واضح کیا کہ ملک کی سرحدوں کے دفاع کے لیے سیکیورٹی فورسز مکمل طور پر تیار اور پرعزم ہیں۔
بیان میں مزید کہا گیا کہ ’’عزمِ استحکام‘‘ کے تحت انسدادِ دہشت گردی آپریشنز بھرپور انداز میں جاری رہیں گے اور دہشت گردوں کے خاتمے تک یہ کارروائیاں جاری رہیں گی۔

باجوڑ آپریشن پر قومی قیادت کا سیکیورٹی فورسز کو خراجِ تحسین

اسلام آباد: باجوڑ میں سیکیورٹی فورسز کی کامیاب کارروائی پر قومی قیادت نے بہادر جوانوں کو زبردست خراجِ تحسین پیش کیا ہے، آپریشن میں انتہائی مطلوب خارجی سرغنہ سمیت چار دہشت گرد مارے گئے۔

وزیراعظم شہباز شریف نے کہا کہ فورسز نے غیر معمولی پیشہ ورانہ مہارت کا مظاہرہ کرتے ہوئے خارجی کمانڈر امجد عرف مزاحم کو ہلاک کیا۔

انہوں نے کہا کہ سیکیورٹی فورسز نے پاکستان کی سالمیت کے دشمنوں کے مذموم عزائم خاک میں ملا دیے۔

وزیراعظم نے اس عزم کا اعادہ کیا کہ عوام کی جان و مال کے تحفظ کے دشمن عناصر کو شکست دیتے رہیں گے، جبکہ حکومت ملک سے دہشت گردی کے مکمل خاتمے کے لیے پرعزم ہے۔

صدرِ مملکت آصف علی زرداری نے بھی باجوڑ آپریشن میں دہشت گردوں کی دراندازی ناکام بنانے پر فورسز کی کارکردگی کو سراہا۔

انہوں نے کہا کہ فتنۂ خوارج کے سرغنہ سمیت چار دہشت گردوں کی ہلاکت قوم کے عزم و استقامت کی کامیابی ہے۔

صدر زرداری نے کہا کہ وطن کی سرحدوں کے دفاع میں فورسز کا کردار قابلِ فخر ہے، اور قوم اپنی مسلح افواج کے شانہ بشانہ کھڑی ہے، فتنۂ خوارج کے مکمل خاتمے تک جدوجہد جاری رہے گی۔

وفاقی وزیرِ داخلہ محسن نقوی نے کہا کہ سیکیورٹی فورسز نے ہائی ویلیو ٹارگٹ سمیت چار خوارج کو ہلاک کر کے اپنی پیشہ ورانہ مہارت اور جرات مندی ثابت کی۔

ان کا کہنا تھا کہ قوم کو اپنی فورسز کی قربانیوں پر فخر ہے اور دہشت گردی کے خلاف جنگ میں پوری قوم اپنے بہادر سپاہیوں کے ساتھ کھڑی ہے۔