کراچی میں چائے کے ہوٹلوں پر رات دیر تک بیٹھنے والے ہوجائیں ہوشیار؛ بڑا فیصلہ ہوگیا

کمشنر کراچی سید حسن نقوی نے شہر بھر میں فٹ پاتھوں اور سڑکوں پر قائم ہونے والے چائے خانوں اور ہوٹلوں کے خلاف کارروائی کا آغاز کر دیا ہے۔

 بدھ کے روز کمشنر آفس سے جاری کیے گئے ہینڈ آوٹ کے مطابق تمام ڈپٹی کمشنرز کو اپنے متعلقہ اضلاع میں یہ کریک ڈاؤن شروع کرنے کی ہدایت دی گئی۔ کارروائی میں فٹ پاتھوں اور سڑکوں پر لگائے گئے پورٹیبل کرسیاں، میزیں اور دیگر سامان ضبط کیا گیا۔

 اس دوران 38 چائے خانوں اور ہوٹلوں کو سیل کر دیا گیا ہے۔ کمشنر کراچی سید حسن نقوی کا کہنا تھا کہ ضبط کیے گئے سامان کو قانونی کارروائی کے بغیر واپس نہیں کیا جائے گا۔

ضلع وار کارروائیاں:

کمشنر کراچی کے مطابق ضلع وسطی میں 30 چائے خانوں اور ہوٹلوں کو سیل کیا گیا، جبکہ ضلع جنوبی میں 7 اور ضلع کورنگی میں ایک ہوٹل کو سیل کیا گیا۔ ان کارروائیوں میں فٹ پاتھوں اور سڑکوں پر قائم چائے خانوں اور ہوٹلوں کے علاوہ ان علاقوں میں دیگر کاروباروں کے خلاف بھی اقدامات کیے گئے۔

ضلع وسطی میں ناظم آباد، مجاہد کالونی، نارتھ ناظم آباد اور حیدری میں بھی کارروائیاں کی گئیں۔ ان علاقوں میں پیدل چلنے والوں اور ٹریفک کے راستے میں آنے والی 15 دکانوں کے خلاف کارروائی کی گئی۔

ضلع جنوبی میں پی آئی ڈی سی پر رات گئے کھلنے والے دو چائے خانوں کو سیل کر دیا گیا۔ اس کے علاوہ، نشتر روڈ پر تجاوزات کے سبب 2 دکانیں سیل کی گئیں اور برنس روڈ پر 3 دکانوں کو بھی سیل کیا گیا۔

ضلع شرقی اور دیگر علاقوں میں بھی کارروائیاں:

ضلع شرقی میں صفورا، حسن اسکوائر سے لے کر عیسیٰ نگری تک ٹھیلوں اور پتھاروں کے خلاف کارروائی کی گئی۔ بن قاسم سب ڈویژن میں این فائیو ہائی وے پر اسٹیل ٹاؤن میں غیرقانونی اسٹرکچر کو منہدم کیا گیا۔

ماڈل کالونی میں تجاوزات مافیا کے افراد کے خلاف سعود آباد پولیس اسٹیشن میں مقدمہ درج کروایا گیا ہے۔ یہ کارروائیاں تجاوزات مافیا کے خلاف حکومتی عزم کو ظاہر کرتی ہیں اور شہر کو صاف ستھرا بنانے کے لیے حکومتی اقدامات کا حصہ ہیں۔