کسی بھی بیرونی جارحیت کا جواب سخت اور شدید ہوگا، ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) لیفٹیننٹ جنرل احمد شریف چوہدری نے کہا ہے کہ کسی بھی بیرونی جارحیت کا جواب سخت اور شدید ہوگا۔

ایبٹ آباد میں ڈی جی آئی ایس پی آر لیفٹیننٹ جنرل احمد شریف چوہدری نے مختلف جامعات کے اساتذہ اور طلبا سے خصوصی نشست میں ملاقات کی، اس موقع پر اساتذہ اور طلبا کی بڑی تعداد شریک ہوئی۔

ملاقات کے دوران ڈی جی آئی ایس پی آر نے حالیہ پاک افغان کشیدگی، ملکی سلامتی کی صورتحال، اور معرکہ حق سمیت اہم قومی و علاقائی موضوعات پر تفصیلی گفتگو کی۔

انہوں نے واضح کیا کہ پاکستان نے دہشت گردی اور فتنہ الخوارج کے خلاف مؤثر اور ٹھوس اقدامات کیے ہیں۔

لیفٹیننٹ جنرل احمد شریف چوہدری نے کہا کہ پاک فوج دفاعِ وطن کے لیے ہر دم تیار ہے، اور کسی بھی بیرونی جارحیت کا جواب سخت اور بھرپور انداز میں دیا جائے گا۔

اساتذہ اور طلبا نے اس موقع پر شہداء اور غازیانِ وطن کو زبردست خراجِ تحسین پیش کیا۔

ہزارہ یونیورسٹی کے وائس چانسلر ڈاکٹر اکرام اللہ خان نے کہا کہ وطن سے محبت کا صحیح استعارہ پاک فوج ہے، جو ہمیشہ محاذِ اول پر رہتی ہے، اور ہم اس کے شانہ بشانہ کھڑے ہیں۔

اساتذہ نے کہا کہ دشمن عناصر نوجوانوں کے ذہنوں کو گمراہ کرنے کی کوششوں میں مصروف ہیں، اس لیے ضروری ہے کہ نوجوانوں کو درست اور مصدقہ معلومات فراہم کی جائیں۔

طلبا نے اظہارِ خیال کرتے ہوئے کہا کہ انہیں آج سوشل میڈیا پر پاک فوج کے خلاف پھیلائی جانے والی غلط افواہوں کے بارے میں درست آگاہی ملی، ڈی جی آئی ایس پی آر کے جوابات نے ملکی و صوبائی حالات اور افواجِ پاکستان کے کردار کے حوالے سے پائے جانے والے ابہام دور کر دیے۔

طلبا نے کہا کہ انہیں فخر ہے کہ وہ ایک ایسے ملک کے شہری ہیں جہاں افواجِ پاکستان جیسے ادارے نوجوانوں کو حوصلہ، رہنمائی اور وطن سے محبت کا پیغام دیتے ہیں۔