تاریخ کی سب سے سخت ترین ٹھنڈ!!! محکمہ موسمیات نے خطرے کی گھنٹی بجادی

نیشنل ڈیزاسٹر مینجمنٹ اتھارٹی (این ڈی ایم اے) نے آئندہ تین سے چار ماہ کے دوران پاکستان کے مختلف علاقوں میں سردی کی شدت میں اضافے اور اسموگ کے بڑھنے کی پیش گوئی کی ہے۔

 این ڈی ایم اے کے سینئر ماہر ڈاکٹر طیب شاہ نے میڈیا بریفنگ میں بتایا کہ نومبر کے اختتام تک سائبیریا سے آنے والی سرد ہوائیں شمالی اور وسطی پاکستان میں سردی میں اضافے کا باعث بنیں گی۔

ڈاکٹر طیب شاہ کے مطابق دسمبر کے دوران شمالی علاقوں میں شدید سردی کی توقع ہے، جبکہ میدانی اور جنوبی علاقے نسبتاً معتدل رہیں گے۔ نومبر کے آخر تک درجہ حرارت میں بتدریج کمی آئے گی کیونکہ سائبیریائی ہائی سسٹم مضبوط ہوگا اور شمالی و وسطی علاقوں میں ٹھنڈی ہوائیں داخل ہوں گی۔

این ڈی ایم اے کی رپورٹ کے مطابق اس موسمِ سرما میں گلگت بلتستان، چترال اور بالائی خیبر پختونخوا میں معمول سے کم برفباری متوقع ہے۔ اکتوبر میں ہلکی برفباری کی پیش گوئی کی گئی ہے، تاہم مستقل برف کا سلسلہ وسط نومبر سے دسمبر تک جاری رہنے کا امکان ہے۔

برف کی کم مقدار گلیشیئرز کی صحت اور اگلے سال کے آبی وسائل پر اثر ڈال سکتی ہے، لیکن این ڈی ایم اے کے مطابق مون سون کے دوران ذخائر میں مناسب پانی موجود ہونے کی وجہ سے آبی بحران کا خدشہ کم ہے۔

شمالی پہاڑی علاقوں جیسے کوہستان، مانسہرہ، سوات، دیامر، استور، نگر اور نیلم میں لینڈ سلائیڈنگ کا خطرہ برقرار رہے گا۔ جماؤ اور پگھلاؤ کے عمل کی وجہ سے قراقرم ہائی وے اور نیلم ویلی روڈ پر رکاوٹیں پیدا ہو سکتی ہیں۔

جنوبی پاکستان میں خاص طور پر بلوچستان اور سندھ کے کچھ حصوں میں خشک سالی کے خدشات ہیں۔ چاغی، نوشکی، پنجگور اور گوادر سمیت دیگر اضلاع میں ہلکی سے معتدل خشک سالی کی پیش گوئی کی گئی ہے۔

 این ڈی ایم اے نے متعلقہ حکومتوں کو مشورہ دیا ہے کہ وہ گراؤنڈ واٹر مینجمنٹ اور موسمیاتی لحاظ سے مناسب زراعت کے ذریعے خشک سالی سے نمٹنے کے اقدامات کریں۔

اس کے علاوہ این ڈی ایم اے نے اسموگ کو رواں سال کا سب سے سنگین موسمی خطرہ قرار دیا ہے۔ اکتوبر سے دسمبر کے دوران پنجاب کے صنعتی اور زرعی علاقے، خصوصاً لاہور، فیصل آباد، شیخوپورہ، گوجرانوالہ اور ملتان میں ایئر کوالٹی انڈیکس (AQI) 400 سے تجاوز کر سکتا ہے، جو کہ انتہائی خطرناک سطح ہے۔ اسموگ میں اضافے کی بنیادی وجوہات میں درجہ حرارت میں کمی، ہوا کی رفتار میں سستی، نمی کا بڑھنا اور فضائی آلودگی کا جمع ہونا شامل ہیں۔

خیبر پختونخوا کے شہروں میں بھی پشاور سمیت ہلکی سے درمیانی اسموگ کی توقع ہے۔ حکام نے عوامی آگاہی کی مہمات شروع کرنے، فصلوں کے باقیات جلانے پر پابندی اور فضائی آلودگی پر قابو پانے کے لیے اقدامات کرنے کی ہدایت کی ہے تاکہ صحت اور ٹرانسپورٹ کے نقصانات کو کم کیا جا سکے۔