گلگت بلتستان میرا گھر ہے، یہاں کے عوام کی قربانیاں پاکستان کی تاریخ کا روشن باب ہیں؛ صدر مملکت

گلگت: صدر مملکت آصف علی زرداری نے کہا ہے کہ گلگت بلتستان میرا گھر ہے، یہاں کے عوام کی قربانیاں پاکستان کی تاریخ کا روشن باب ہیں۔

یکم نومبر 1947 کو ڈوگرہ راج سے آزادی حاصل کرنے والے گلگت بلتستان میں آج 78 واں یومِ آزادی قومی جوش و جذبے کے ساتھ منایا جا رہا ہے۔

اس موقع پر مرکزی تقریب کا انعقاد ہوا جس میں صدرِ مملکت آصف علی زرداری نے بطورِ مہمانِ خصوصی شرکت کی۔

تقریب کا آغاز قومی ترانے اور پرچم کشائی سے ہوا، جہاں گورنر گلگت بلتستان سید مہدی شاہ اور وزیراعلیٰ حاجی گلبر خان نے صدرِ مملکت کا استقبال کیا اور انہیں روایتی ٹوپی پہنائی۔

صدر مملکت آصف علی زرداری نے پریڈ کا معائنہ کیا اور آزادی کے شہداء کو خراجِ عقیدت پیش کیا۔

صدر آصف علی زرداری نے اپنے خطاب میں کہا کہ گلگت بلتستان میرا گھر ہے، یہاں کے عوام کی بہادری اور قربانیاں پاکستان کی تاریخ کا روشن باب ہیں

انہوں نے کہا کہ 1947 میں آپ نے جہاد کرکے پاکستان کے ساتھ الحاق کیا، آپ کی بہادری کو قوم کبھی نہیں بھولے گی۔

ان کا کہنا تھا کہ بھارت میں مسلم اکثریت کو اقلیت میں تبدیل کیا جا رہا ہے، جبکہ مقبوضہ کشمیر اب بھی بھارتی تسلط کا شکار ہے، مسئلہ کشمیر اقوام متحدہ کی قراردادوں کے مطابق حل ہونا چاہیے۔

آصف علی زرداری نے گلگت بلتستان کی ترقی اور تعلیم پر زور دیتے ہوئے کہا کہ جی بی کی ہر وادی میں اسکول ہونے چاہئیں، یہ علاقہ قدرتی وسائل اور سیاحت کے لحاظ سے دنیا میں منفرد مقام رکھتا ہے۔

وزیراعلیٰ گلگت بلتستان حاجی گلبر خان نے تقریب سے خطاب میں کہا کہ ہم 78 سال سے پاکستان کو اپنی منزل سمجھتے ہیں۔ آج کا دن ہمارے غیور عوام کی قربانیوں کا دن ہے۔ گلگت بلتستان قدرتی وسائل سے مالامال ہے اور ہم آنے والی نسلوں کو بہتر مستقبل دینے کے لیے پرعزم ہیں۔

انہوں نے مزید کہا کہ فیلڈ مارشل عاصم منیر کی نڈر قیادت میں “معرکہ حق” میں کامیابی نے پاکستان کا وقار بلند کیا ہے۔

اس موقع پر چیئرمین پیپلز پارٹی بلاول بھٹو زرداری نے بھی گلگت بلتستان کے عوام کو آزادی کی سالگرہ پر مبارکباد دی۔

اپنے پیغام میں انہوں نے کہا کہ 78 سال قبل گلگت بلتستان کے عوام نے تاریخ کا سنہری باب رقم کیا، پیپلز پارٹی نے جی بی کو پہلی بار سیاسی شناخت اور خودمختاری دی، اور ہم ان کے آئینی حقوق کے لیے پرعزم ہیں۔

پوری تقریب قومی جوش و جذبے، ملی نغموں اور پاکستان سے محبت کے مظاہرے سے جگمگا اٹھی، گلگت بلتستان کے مختلف شہروں میں بھی یومِ آزادی کی مناسبت سے تقریبات، پریڈز، اور آتش بازی کے مظاہرے کیے گئے۔