ای چالان کس طرح معاف کروائیں؟ آئی جی سندھ نے طریقہ بتادیا

آئی جی سندھ غلام نبی میمن کا ای چالان سے متعلق کہنا ہے کہ اگر کسی شہری کی غلطی نہ ہو، تو انہیں جرمانہ نہیں کیا جائے گا۔   

کراچی میں چوری شدہ موٹر سائیکل کے مالک کو ای چالان موصول ہونے کا واقعہ شہریوں میں تشویش کا باعث بن گیا تھا۔ اس پر آئی جی سندھ غلام نبی میمن نے فوری طور پر وضاحت دیتے ہوئے کہا کہ اگر کسی شہری کی غلطی نہ ہو، تو انہیں جرمانہ نہیں کیا جائے گا۔ ان کا مزید کہنا تھا کہ شہری اپنی شکایات یا غلط چالان کے بارے میں کسی بھی سہولت مرکز پر جا کر تصدیق کروا کر چالان معاف کروا سکتے ہیں۔

غلام نبی میمن نے اس موقع پر یقین دہانی کروائی کہ جدید نظام کی مدد سے چوری شدہ موٹر سائیکلوں کو بازیاب کرنے اور اس جرم میں ملوث ملزمان کو گرفتار کرنے کے لیے اقدامات کیے جا رہے ہیں۔

اس سے قبل آئی جی سندھ کی زیر صدارت سینٹرل پولیس آفس کراچی میں فیس لیس ای ٹکٹنگ سسٹم پر ایک جائزہ اجلاس منعقد ہوا، جس میں صوبے بھر کے اعلیٰ پولیس افسران نے شرکت کی۔ اس اجلاس میں ایڈیشنل آئی جیز، ڈی آئی جیز، ڈی جی سیف سٹی اور دیگر افسران بھی موجود تھے۔

ڈی آئی جی ٹریفک کراچی نے اجلاس کے دوران نظام کی کارکردگی پر تفصیل سے بریفنگ دی اور بتایا کہ 27 اکتوبر سے کراچی میں فیس لیس ای ٹکٹنگ سسٹم کا باقاعدہ آغاز کیا جا چکا ہے۔ اس نظام کو شہریوں کی جانب سے مثبت ردعمل اور پذیرائی مل رہی ہے۔ تاہم، کئی شہریوں نے نظام میں بہتری کے لیے تجاویز بھی پیش کیں۔

کراچی ٹریفک مینجمنٹ بورڈ کے قیام کی ضرورت پر بھی زور دیا گیا تاکہ روڈ سیفٹی کو بہتر بنایا جا سکے۔ اجلاس میں یہ بات بھی زیرِ غور آئی کہ سندھ کے دیگر اضلاع میں فیس لیس ای چالان سسٹم کیسے متعارف کروایا جا سکتا ہے۔

تجویز دی گئی کہ جب تک سیف سٹی منصوبہ مکمل طور پر فعال نہیں ہوتا، اس دوران مصروف شاہراہوں اور اہم مقامات پر موجود سرکاری کیمروں کے ذریعے ای چالان سسٹم نافذ کیا جا سکتا ہے۔

آئی جی سندھ غلام نبی میمن نے اجلاس میں ڈی آئی جی ٹریفک کراچی کی کارکردگی کو سراہتے ہوئے کہا کہ اس جدید نظام کا مقصد ٹریفک حادثات کی روک تھام اور نظم و ضبط کو یقینی بنانا ہے۔ انہوں نے واضح کیا کہ حادثات کی بڑی وجہ تیز رفتاری ہے، اس لیے رفتار کی خلاف ورزی کرنے والوں کے خلاف سخت کارروائی کی جائے گی۔