سندھ جاب پورٹل پر پہلی نوکری کا اشتہار آگیا؛ اپلائی کرنے کا طریقہ کار جان لیں

سندھ جاب پورٹل پر جونیئر کلرک کی ملازمتوں کا پہلا اشتہار جاری کر دیا گیا ہے۔

وزیراعلیٰ سندھ سید مراد علی شاہ نے صوبے کے نوجوانوں کو اس موقع سے فائدہ اٹھاتے ہوئے سندھ جاب پورٹل پر درخواست دینے کی ہدایت دی ہے۔ اس کے علاوہ، پورٹل پر درخواست دینے کا طریقہ کار بھی فراہم کیا گیا ہے تاکہ نوجوان آسانی سے اپنی درخواستیں جمع کروا سکیں۔

سینئر وزیر سندھ شرجیل میمن نے اس حوالے سے بتایا کہ سندھ جاب پورٹل پر اب تک 3 لاکھ 26 ہزار سے زائد امیدوار رجسٹر ہو چکے ہیں، جنہیں مختلف سرکاری و نجی اداروں میں میرٹ کی بنیاد پر بھرتی کے لئے اہل قرار دیا گیا ہے۔ انہوں نے کہا کہ پورٹل کا نظام خودکار اور جدید ہے، جس میں درخواست دہندگان کی اہلیت، تعلیم اور تجربے کی بنیاد پر مکمل طور پر ڈیجیٹل اسکریننگ کی جاتی ہے۔

شرجیل میمن نے کہا کہ اس پورٹل کے ذریعے نوجوانوں کو گھر بیٹھے ملازمتوں تک رسائی حاصل ہو رہی ہے۔ گریڈ 5 سے 15 تک کی سرکاری آسامیاں، ٹیکنیکل اور نان ٹیکنیکل ملازمتیں، اور نجی شعبے کے مواقع بھی پورٹل پر دستیاب ہیں۔

انہوں نے کہا کہ ہر درخواست دہندہ کا ڈیٹا محفوظ رکھا جاتا ہے اور میرٹ کی بنیاد پر خودکار طریقے سے میچنگ کی جاتی ہے۔ سندھ حکومت نوجوانوں کے لیے روزگار کے دروازے کھولنے کے ساتھ ساتھ انہیں جدید مہارتوں سے بھی آراستہ کرنے پر توجہ دے رہی ہے۔ پورے نظام کی نگرانی شفاف انداز میں کی جارہی ہے اور تمام ریکارڈ آڈٹ کے قابل ہیں۔ ہر بھرتی کا عمل ڈیجیٹل ٹریس کے تحت محفوظ رہتا ہے۔

شرجیل میمن نے اس بات پر زور دیا کہ سندھ حکومت نے ہمیشہ میرٹ اور شفافیت کو ترجیح دی ہے اور نوجوانوں کے روشن مستقبل کے لئے کبھی بھی سمجھوتہ نہیں کیا جائے گا۔