خیبر پختونخوا میں سیکیورٹی فورسز کی 2 کارروائیاں، 3 خوارج ہلاک

آئی ایس پی آر کا کہنا ہے کہ خیبر پختونخوا میں سیکیورٹی فورسز نے 2 کارروائیوں کے دوران 3 خوارجیوں کو جہنم واصل کردیا۔

پاک فوج کے شعبہ تعلقات عامہ ( آئی ایس پی آر) کے مطابق پاک فوج نے شمالی وزیرستان میں پاک افغان سرحد پار کرنے کی کوشش ناکام بنا دی، ایشرم کے قریب خوارج کے گروہ کی نقل و حرکت فورسز نے پکڑ لی، سیکیورٹی فورسز کی مؤثر کارروائی سے2 بھارتی پراکسی فتنہ الخوارج ہلاک ہو گئے۔ ہلاک خوارج میں افغان بارڈر پولیس کا اہلکار خارجی قاسم بھی شامل تھا۔

آئی ایس پی آر کا کہنا ہے کہ پاک فوج نے ٹانک میں انٹیلی جنس بنیاد پر کارروائی کی جس دوران ایک اور خارجی ہلاک ہو گیا، ہلاک دہشتگرد کی شناخت اکرام الدین عرف ابو دجانہ کے نام سے ہوئی۔

آئی ایس پی آر کے مطابق دہشتگردی میں افغان شہریوں کی شمولیت ایک بار پھر بے نقاب ہو گئی، پاکستان نے عبوری افغان حکومت سے بارڈر مینجمنٹ بہتر بنانے کا مطالبہ کردیا، پاکستان نے افغان سرزمین کو دہشتگردوں کے استعمال سے روکنے پر زور دیا۔

آئی ایس پی آر کا کہناہے کہ پاکستان کی سیکیورٹی فورسز سرحدی دفاع کے لیے پرعزم ہیں، علاقے میں بھارتی سرپرستی یافتہ خوارج کے خاتمے کے لیے سرچ آپریشن جاری ہے، عزمِ استحکام کے تحت ملک گیر انسدادِ دہشتگردی مہم پوری قوت سے جاری ہے، دہشتگردی کے مکمل خاتمے تک آپریشن جاری رہے گا۔

وزیراعظم اور صدر مملکت کا فتنہ الخوارج کے خلاف کارروائیوں پر سیکیورٹی فورسز کو خراج تحسین

وزیراعظم اور صدر مملکت نے فتنہ الخوارج کے خلاف کارروائیوں پر سیکیورٹی فورسز کو خراج تحسین پیش کیا۔

وزیراعظم شہباز شریف کا کہنا تھا کہ دہشتگردی کے خلاف عزم استحکام میں پوری قوم سیکیورٹی فورسز کے ساتھ کھڑی ہے، ملک سے ہر قسم کی دہشت گردی کے مکمل خاتمے کے لیے پر عزم ہیں۔

دوسری جانب صدر مملکت نے خیبر پختونخوا میں دراندازی ناکام بنانے پر سیکیورٹی فورسز کو خراج تحسین پیش کرتے ہوئے کہا کہ بھارتی پشت پناہی یافتہ فتنہ خوارج کو شکست دینا ملکی امن کے لیے ضروری ہے۔

انہوں نے کہا کہ قوم کو اپنی افواج کی بہادری پر فخر ہے، سیکیورٹی فورسز کی بروقت کارروائی قابل تحسین ہے، دہشت گردی کے خاتمے تک عزمِ استحکام جاری رہے گا۔

صدرمملکت کا کہنا تھا کہ پاکستان اپنے دفاع اور سلامتی پر کوئی سمجھوتہ نہیں کرے گا، اللہ وطن عزیز کو دہشت گردی سے محفوظ رکھے۔