ای چالان سے متعلق بڑی خبر آ گئی؛ اب کتنا جرمانہ دینا ہوگا؟

شہر قائد کراچی میں ای چالان کے ذریعے جاری کیے جانے والے جرمانوں نے شہریوں کی مشکلات بڑھا دی ہیں۔

 27 اکتوبر سے موٹر سائیکل اور کار ڈرائیوروں کے خلاف اوور اسپیسڈنگ، سیٹ بیلٹ نہ باندھنا، ہیلمٹ نہ پہننا، ٹریفک سگنل کی خلاف ورزی، گاڑیوں کی ہیڈ لائٹس اور انڈیکٹر لائٹس نہ ہونا اور سائیڈ مرر کی کمی پر کروڑوں روپے کے جرمانے عائد کیے گئے ہیں۔

خاص طور پر کم آمدنی والے شہری اس صورتحال سے پریشان ہیں۔ وزیراعلیٰ سندھ کے بیان کے مطابق پہلے چالان معاف ہونے کی توقع تھی، تاہم اب ٹریفک پولیس نے اس حوالے سے واضح موقف اختیار کیا ہے۔

ٹریفک پولیس کے مطابق پہلے ای چالان پر صرف ان شہریوں کو جرمانہ معاف کیا جائے گا جو باضابطہ ٹریفک قوانین کی خلاف ورزی پر معافی نامہ دیں گے۔ اگر کسی شخص کا دوسرا ای چالان جاری ہوتا ہے تو اسے 14 دن کے اندر جمع کرانے پر جرمانے کی رقم پر 50 فیصد رعایت دی جائے گی۔ 21 دن کے اندر جمع کرانے پر پورا جرمانہ ادا کرنا ہوگا۔

موٹر سائیکل سوار کی مثال دیتے ہوئے پولیس حکام نے بتایا کہ سگنل توڑنے پر 5 ہزار روپے کا جرمانہ عائد ہوتا ہے۔ اگر 14 دن کے اندر یہ جرمانہ جمع کیا جائے تو شہری صرف 2,500 روپے ادا کرے گا۔

ٹریفک پولیس نے واضح کیا ہے کہ تمام ای چالان کی رقم 14 دن کے اندر جمع کرانے پر رعایت دی جائے گی۔ شہریوں کو چاہیے کہ وہ جرمانہ جلد جمع کرائیں تاکہ اضافی رقم ادا نہ کرنی پڑے۔