امریکہ میں پاکستانی سفیر نے پاک، امریکہ جوائنٹ بزنس کانفرنس و ایکسپو 2025 کا افتتاح کر دیا

ورجینیا:امریکہ میں تعینات پاکستان کے سفیر رضوان سعید شیخ نے ورجینیا میں "پاک،امریکا جوائنٹ بزنس کانفرنس و ایکسپو 2025” کا افتتاح کرتے ہوئے کہا ہے کہ پاکستان اور امریکا کے درمیان تعلقات کی مضبوط بنیاد تجارت، سرمایہ کاری اور اقتصادی تعاون ہونا چاہیے۔
افتتاحی تقریب سے خطاب کرتے ہوئے پاکستانی سفیر نے زور دیا کہ دونوں ممالک کے تعلقات کو پائیدار بنانے کے لیے اقتصادی روابط کو مرکزی حیثیت دینی ہوگی۔ انہوں نے کہا کہ "پاکستان اور امریکا کے درمیان تعلقات کو سب سے بہتر طور پر تجارت، سرمایہ کاری اور کاروباری تعاون کے ذریعے مضبوط کیا جا سکتا ہے۔”
سفیر رضوان سعید شیخ نے پاکستانی کاروباری اداروں پر زور دیا کہ وہ امریکی مارکیٹ کی ضروریات اور معیار کے مطابق اپنی کاروباری حکمتِ عملی میں جدید تبدیلیاں لائیں تاکہ عالمی مسابقت میں کامیابی حاصل کی جا سکے۔ انہوں نے اس موقع کو ایک "بیج بونے کی مشق” قرار دیا جو مستقبل میں دیرپا معاشی شراکت داری کی بنیاد رکھے گا۔
پاکستانی سفیر نے مزید کہا کہ سفارت خانہ تمام شرکاء کو ہر ممکن مدد فراہم کرے گا تاکہ وہ اپنی کاروباری حکمتِ عملی کو امریکی مارکیٹ کے تقاضوں کے مطابق ڈھال سکیں۔
ایکسپو میں پاکستان کے مختلف شعبوں سے تعلق رکھنے والی کمپنیوں نے حصہ لیا، جن میں ٹیکسٹائل، آئی ٹی، سیاحت اور رئیل اسٹیٹ شامل ہیں۔ شرکاء نے امریکا میں کاروباری مواقع تلاش کرنے، سرمایہ کاری کو فروغ دینے اور دوطرفہ تجارتی تعلقات کو مزید وسعت دینے کے عزم کا اظہار کیا۔