کراچی میں والدین نے اسپتال کے اخراجات پورے کرنے کے لیے اپنا نومولود بچہ بیچ دیا

کراچی کے علاقے میمن گوٹھ میں ایک نجی اسپتال میں اسپتال کے اخراجات ادا کرنے کے لیے نومولود بچے کی فروخت کا واقعہ منظرِ عام پر آیا ہے، جسے ایک خاتون نے خرید کر پنجاب میں فروخت کر دیا تھا۔

تفصیلات کے مطابق شمع نامی حاملہ خاتون نے اسپتال میں معائنہ کروایا تو ڈاکٹر نے اُس سے زچگی آپریشن کے اخراجات کی ادائیگی کا مطالبہ کیا۔

خاتون نے رقم نہ ہونے کا ذکر کیا تو ڈاکٹر نے اُسے ایک خاتون کا حوالہ دیا جس کے مطابق وہ نہ صرف بچہ پالے گی بلکہ اسپتال کے تمام اخراجات بھی برداشت کرے گی۔

خاتون نے ڈاکٹر کے مشورے پر رضامندی ظاہر کی اور آپریشن کے بعد نومولود بچے کو خاتون شمع بلوچ کے حوالے کر دیا۔

تاہم، بعد ازاں والد سارنگ نے اسپتال پہنچ کر یہ انکشاف کیا کہ اُن کی بیوی نے بچے کو اس خاتون کے حوالے کیا، لیکن رابطہ کرنے کی کوششوں کے باوجود شمع بلوچ کا موبائل نمبر بند تھا۔

سارنگ نے پولیس میں شکایت درج کروائی کہ اُسے شبہ ہے کہ شمع بلوچ نے ان کا بچہ کسی اور کو فروخت کر دیا ہے، جس پر پولیس نے مقدمے کی تفتیش اینٹی وائلنٹ کرائم سیل کے حوالے کی۔

پولیس نے فوری طور پر کارروائی کرتے ہوئے پنجاب سے بچہ بازیاب کر لیا اور اُسے والدین کے حوالے کیا، اسپتال کو سیل کر دیا گیا ہے اور ڈاکٹر زہرا اور شمع بلوچ کے خلاف کارروائی شروع کی گئی ہے۔

پولیس کے مطابق شمع بلوچ اسپتال کی ملازمہ ہے اور اُس نے ڈاکٹر زہرا کے ساتھ مل کر یہ غیر قانونی عمل انجام دیا۔

ایس ایس پی ملیر عبدالخالق پیرزادہ نے بتایا کہ دونوں ملزمان کو گرفتار کرنے کے لیے چھاپے مارے گئے ہیں لیکن ابھی تک کامیابی حاصل نہیں ہو سکی، پولیس کا کہنا ہے کہ وہ دونوں کو جلد گرفتار کر کے قانون کے کٹہرے میں لائیں گے۔