وزیراعظم نے 27 ویں آئینی ترمیم کی حمایت کی درخواست کی، بلاول بھٹو

چیئرمین پیپلز پارٹی بلاول بھٹو زرداری نے کہا ہے کہ وزیراعظم شہباز شریف نے 27 ویں آئینی ترمیم کی حمایت کی درخواست کی ہے۔

تفصیلات کے مطابق سماجی رابطے کی ویب سائٹ ایکس پر جاری کردہ ایک بیان میں کہا کہ وزیراعظم کی جانب سے پیش کی جانے والی ترمیم میں اہم نکات شامل ہیں، جن میں آئینی عدالت کا قیام، ایگزیکٹو مجسٹریٹس اور ججز کے تبادلے کے متعلق تجاویز شامل ہیں۔

انہوں نے کہا کہ وزیراعظم شہباز شریف کی سربراہی میں مسلم لیگ ن کے ایک وفد نے پیپلز پارٹی کے شریک چیئرمین آصف علی زرداری اور ان سے ملاقات کی۔ اس ملاقات میں وزیراعظم نے پیپلز پارٹی سے آئندہ آنے والی 27 ویں آئینی ترمیم کی حمایت کی درخواست کی۔

ان کا کہنا تھا کہ 27 ویں ترمیم میں این ایف سی ایوارڈ کے تحت صوبوں کے حصے کا تحفظ ختم کرنے کی تجویز بھی دی گئی ہے، اس کے علاوہ آرٹیکل 243 میں ترمیم، تعلیم اور آبادی کی منصوبہ بندی کو وفاق کے زیر انتظام لانے کی تجاویز بھی شامل ہیں۔

بلاول بھٹو زرداری نے کہا کہ 27 ویں ترمیم کے ایک اور اہم حصے میں الیکشن کمیشن کے ارکان کی تقرری پر موجود ڈیڈلاک کو ختم کرنے کی تجویز بھی پیش کی گئی ہے

چیئرمین پیپلز پارٹی کا مزید کہنا تھا کہ صدر آصف علی زرداری کی قطر سے واپسی کے بعد پیپلز پارٹی کی سینٹرل ایگزیکٹو کمیٹی کا اجلاس 6 نومبر کو منعقد ہوگا، جس میں پارٹی کی پالیسی پر مشاورت کی جائے گی اور 27 ویں ترمیم پر پارٹی کا موقف طے کیا جائے گا۔