اس سے تیز گاڑی یا بائیک چلائی تو بھاری جرمانہ ہوگا! کراچی کی تمام اہم شاہراہوں پر نئی اسپیڈ لمٹ کیا ہے؟ جان لیں

کراچی میں ٹریفک کے بہاؤ کو بہتر بنانے اور حادثات کی شرح کو کم کرنے کے لیے کراچی ٹریفک پولیس نے شہر کی تمام اہم شاہراہوں پر نئی رفتار کی حد مقرر کر دی ہے۔

ڈی آئی جی ٹریفک پیر محمد شاہ کے مطابق یہ اقدام جدید ای چالان سسٹم کے تحت نافذ کیا جا رہا ہے جس کا مقصد ٹریفک کی نگرانی اور خلاف ورزیوں کی فوری نشاندہی کرنا ہے۔

نئی رفتار کی حد کے مطابق موٹر سائیکلوں اور ہلکی گاڑیوں کے لیے زیادہ سے زیادہ رفتار 60 کلومیٹر فی گھنٹہ اور بھاری گاڑیوں کے لیے یہ حد 30 کلومیٹر فی گھنٹہ رکھی گئی ہے۔

اس کے ساتھ ہی شہر بھر میں جدید کیمروں کی مدد سے رفتار کی نگرانی کی جائے گی، تاکہ ٹریفک قوانین کی خلاف ورزی کی صورت میں فوری چالان کیے جا سکیں۔

پیر محمد شاہ نے بتایا کہ اس سسٹم کو مؤثر بنانے کے لیے 10 ہزار بھاری گاڑیوں میں ٹریکنگ ڈیوائسز نصب کی جا رہی ہیں، جو ٹریفک ریگولیشن اینڈ سائٹیشن سسٹم سے منسلک ہوں گی، اس کے ذریعے گاڑیوں کی حرکت کا حقیقی وقت میں جائزہ لیا جا سکے گا۔

اس وقت کراچی کے 40 فیصد علاقے میں یہ نظام فعال ہے، جہاں 1717 کیمرے نصب کیے گئے ہیں، ضلع جنوبی میں یہ نظام مکمل طور پر فعال ہو چکا ہے، جبکہ شارع فیصل سمیت دیگر بڑی شاہراہیں بھی اس کی نگرانی میں شامل ہیں۔

ملیر، کورنگی، مشرقی، کیماڑی اور ضلع وسطی میں بھی ٹریفک قوانین کی خلاف ورزیوں پر ای چالان جاری کیے جا رہے ہیں، جن میں تیز رفتاری، سگنل توڑنا، الٹی سمت میں گاڑی چلانا، ہیلمٹ نہ پہننا اور سیٹ بیلٹ نہ باندھنا شامل ہیں۔

ڈی آئی جی ٹریفک نے مزید بتایا کہ اس نظام کو اگلے مرحلے میں کراچی کے صنعتی علاقوں جیسے سائٹ، لانڈھی، کورنگی اور نیو کراچی تک توسیع دی جائے گی۔ اس کے علاوہ آئندہ سال کے آغاز سے مزید 11 ہزار کیمرے نصب کیے جائیں گے تاکہ پورے شہر میں ٹریفک مینجمنٹ سسٹم کو مکمل طور پر فعال کیا جا سکے۔

عوامی آگاہی کے لیے 8 نومبر سے ایک ماہ پر مشتمل مہم کا آغاز بھی کیا جائے گا جس میں شہریوں کو ٹریفک قوانین اور نئے ٹریکنگ سسٹم کی اہمیت سے آگاہ کیا جائے گا۔

پیر محمد شاہ نے اعتراف کیا کہ یہ نظام ابھی ابتدائی مراحل میں ہے اور اس میں کچھ خامیاں موجود ہیں، تاہم ان پر مسلسل کام جاری ہے تاکہ کراچی کی ٹریفک کو مزید جدید، محفوظ اور منظم بنایا جا سکے۔