18 ویں ترمیم میں مرکز و صوبوں کے وسائل میں توازن ضروری ہے، رانا ثنا اللہ

اسلام آباد: وزیراعظم کے مشیر برائے سیاسی امور رانا ثنا اللہ نے کہا ہے کہ 18 ویں ترمیم کے تحت وفاق اور صوبوں کے درمیان وسائل کی تقسیم میں توازن پیدا کرنے کی ضرورت ہے تاکہ دونوں سطحوں پر مالی استحکام یقینی بنایا جا سکے۔

تفصیلات کے مطابق رانا ثنا اللہ نے نجی ٹی وی شو میں گفتگو کرتے ہوئے کہا کہ آئین ایک محترم دستاویز ضرور ہے، تاہم اسے بہتر بنانے کے لیے ترامیم کرنا کسی بھی جمہوریت کا معمول ہے۔

انہوں نے کہا کہ آئین پاکستان میں اب تک 26 ترامیم ہوچکی ہیں، اگر پارلیمنٹ کی دو تہائی اکثریت کسی معاملے پر متفق ہو جائے تو مزید ترمیم بھی ممکن ہے۔

ان کا کہنا تھا کہ 18 ویں ترمیم سے مسلم لیگ (ن) کو کوئی اختلاف نہیں، بلکہ بات صرف اس امر پر ہورہی ہے کہ عملی صورتِ حال میں اگر وسائل کی تقسیم میں کوئی عدم توازن پیدا ہوا ہے تو اس پر اتفاقِ رائے سے نظرثانی کی جا سکتی ہے۔

رانا ثنا اللہ نے کہا کہ یہ کہنا درست نہیں کہ کل ہی ہم 27 ویں ترمیم لارہے ہیں، بلکہ یہ ایک تسلسل کے ساتھ جاری سیاسی و آئینی مکالمہ ہے جو جمہوریت کا حصہ ہے۔

انہوں نے کہا کہ وفاق اور صوبوں کے درمیان وسائل کی تقسیم پر ماضی میں طویل مشاورت ہوئی تھی، مگر اب اگر نئے حقائق سامنے آ رہے ہیں تو ان پر سنجیدہ بات چیت سے کوئی حرج نہیں۔

ان کا مزید کہنا تھا کہ اگر اتفاق رائے پیدا ہوا تو پارلیمنٹ دو تہائی اکثریت سے مناسب ترمیم منظور کر سکتی ہے۔