اپنی چھت اپنا گھر اسکیم سے متعلق بڑی خوشخبری آگئی

وزیر اطلاعات پنجاب عظمیٰ بخاری کا کہنا ہے کہ اپنی چھت اپنا گھر پراجیکٹ کے تحت روزانہ 290 گھر بن رہے ہیں۔

وزیر اطلاعات پنجاب عظمیٰ بخاری نے الحمراء میں میڈیا سے گفتگو کرتے ہوئے کہا کہ آج سے وزیراعلیٰ پنجاب کے کاموں کی تفصیلات دی جائیں گی، آج سولہ منصوبوں کے بارے میں معلومات فراہم کروں گی۔

انہوں نے کہا کہ پنجاب میں بہت سارے منصوبے پایہ تکمیل تک پہنچ چکے، ماضی میں عوام سے جھوٹے وعدے کیے گئے، وزیر اعلیٰ پنجاب مریم نواز نے اپنے تمام وعدے پورے کیے، پنجاب کا پیسہ امانت کی طرح استعمال کیا گیا۔

عظمیٰ بخاری نے کہا کہ ستھرا پنجاب وزیر اعلیٰ مریم نواز کا فلیگ شپ پروگرام ہے، کم سے کم  وقت میں سروے مکمل کرکے سیلاب متاثرین کی امداد کو یقینی بنایا، وزیر اعلیٰ مریم نواز کا کوئی بھی منصوبہ فائلوں کی نذر نہیں ہوتا، دعا ہے خیبرپختونخوا کے عوام کی محرومیاں جلد ختم ہوجائیں، دعا ہے وزیر اعلیٰ کے پی کو عوام کے مسائل نظر آجائیں، کوئی ایسی عینک ہو جس سے وزیر اعلیٰ کے پی کو امن وامان کی بگڑی صورتحال نظر آئے۔

    وزیر اطلاعات پنجاب نے کہا کہ 50 لاکھ گھر، ایک کروڑ نوکریوں والے وعدے جھوٹے تھے، الیکٹرک بسوں کا پہلا مرحلہ مکمل ہوچکا، 19 نومبر سے دوسرا مرحلہ شروع ہوگا، دیگر اضلاع میں الیکٹرک بسیں چلیں گی، گزشتہ سال کا ڈیٹا نکالا جائے تو رواں سال اسموگ میں کمی ہوئی۔

انہوں نے کہا کہ لاکھوں خاندانوں کو اپنی چھت اپنا گھر اسکیم کے تحت قرضے دیے جاچکے، دھی رانی پروگرام کے تحت ہزاروں بچیوں کی شادیاں ہوئیں، وزیر اعلیٰ نے چلڈرن ہارٹ سرجری پروگرام شروع کیا، ایک سال میں 7ہزار سے زائد آپریشن کیے جاچکے ہیں۔