افغانستان سے خیبرپختونخواہ میں منشیات کی بڑے پیمانے پر اسمگلنگ کا انکشاف

پشاور: افغانستان سے منشیات کی بڑے پیمانے پر اسمگلنگ اور خیبر پختونخواہ میں دہشتگردی کی پشت پناہی کرنے والے سیاسی و مجرمانہ گٹھ جوڑ (پولیٹیکل ٹیرر کرائم نیکسس) کا انکشاف ہوا ہے۔

ذرائع کے مطابق افغانستان میں موجود ڈرگ مافیا اور خوارج کے نیٹ ورک مل کر منشیات کی تجارت اور دہشتگردی کو مالی معاونت فراہم کر رہے ہیں۔

ذرائع کا کہنا ہے کہ افغانستان سے منشیات کی بڑی مقدار خیبر پختونخواہ اور وادی تیراہ کے راستے پاکستان میں داخل کی جاتی ہے، جہاں مقامی گروہ اور خوارج اس کاروبار میں براہِ راست ملوث ہیں۔

خیبر اور تیراہ کے علاقوں میں تقریباً 12 ہزار ایکڑ رقبے پر منشیات کی کاشت کی جارہی ہے، جس سے سالانہ 18 سے 25 لاکھ روپے فی ایکڑ منافع حاصل ہوتا ہے۔ اس کمائی کا ایک بڑا حصہ دہشتگرد تنظیموں کے پاس جاتا ہے، جو اسے غیر قانونی دھندوں کو تحفظ دینے اور دہشتگردی کے فروغ کے لیے استعمال کرتی ہیں۔

مقامی ذرائع کے مطابق منشیات کی کاشت اور تجارت میں ملوث افراد کو سیاسی سرپرستی حاصل ہے، جس کی وجہ سے قانون نافذ کرنے والے اداروں کی کارروائیوں میں رکاوٹ پیدا کی جاتی ہے۔

ذرائع کا کہنا ہے کہ وادی تیراہ میں آپریشن کی مخالفت کے پیچھے بھی پولیٹیکل ٹیرر نیکسس اور خوارج کا گٹھ جوڑ کارفرما ہے، جو اپنے مالی مفادات کی خاطر امن دشمن عناصر کی پشت پناہی کر رہا ہے۔

رواں سال صرف خیبر ڈسٹرکٹ میں 198 افراد شہید اور زخمی ہوئے، جن کی ذمہ داری براہِ راست اسی سیاسی، مجرمانہ اور دہشتگرد نیٹ ورک پر عائد کی گئی ہے۔

ذرائع کے مطابق متعلقہ اداروں نے اس خطرناک نیٹ ورک کی نشاندہی کے بعد سخت کارروائی کی تیاری شروع کر دی ہے تاکہ خیبر پختونخواہ اور قبائلی اضلاع میں منشیات اور دہشتگردی کے گٹھ جوڑ کا خاتمہ کیا جا سکے۔