کراچی والوں کیلئے بڑی خوشخبری؛ ای چالان جرمانوں پر بڑی رعایت کا اعلان

کراچی: ٹریفک قوانین کی پاسداری کو فروغ دینے کے لیے سندھ پولیس نے ای چالان جرمانوں میں اہم رعایت دے دی ہے۔ اب شہری مقررہ مدت میں جرمانہ ادا کر کے 50 فیصد تک رعایت حاصل کر سکیں گے۔

تفصیلات کے مطابق آئی جی سندھ غلام نبی میمن کی زیر صدارت اجلاس ہوا، جس میں فیس لیس ای ٹکٹنگ سسٹم اور ٹریفک قوانین کے نفاذ کا جائزہ لیا گیا۔ اجلاس میں بتایا گیا کہ نئے قوانین کے تحت صوبے بھر میں ٹریفک جرمانے یکساں لاگو کیے گئے ہیں۔

آئی جی سندھ نے کہا کہ 50 اقسام کی خلاف ورزیوں پر جرمانہ پانچ ہزار روپے تک مقرر کیا گیا ہے، لیکن اگر شہری چالان ملنے کے 14 دن کے اندر ادائیگی کریں تو انہیں 50 فیصد رعایت ملے گی۔ اس صورت میں جرمانہ دو سے ڈھائی ہزار روپے تک رہ جائے گا۔

انہوں نے خبردار کیا کہ مقررہ وقت میں ادائیگی نہ ہونے کی صورت میں جرمانہ بڑھا دیا جائے گا۔
ڈی آئی جی ٹریفک نے بتایا کہ اس وقت 59 خلاف ورزیاں مانیٹر کی جارہی ہیں۔ ان میں کم عمر ڈرائیونگ، ون وے کی خلاف ورزی، ون ویلنگ اور خطرناک اوورٹیکنگ شامل ہیں جن پر 5 ہزار روپے سے زائد جرمانہ عائد کیا گیا ہے۔

ڈی آئی جی نے مزید کہا کہ بھاری گاڑیوں کے جرمانوں کو موٹر سائیکل یا کار کے ساتھ منسوب کرنا غلط ہے۔ شہریوں کی سہولت کے لیے شہر کے 11 مقامات پر ٹریفک فسیلیٹیشن سینٹر قائم کیے گئے ہیں، جہاں شکایات کا اندراج اور حل ممکن ہوگا۔ شکایت کے دورانیے کو جرمانے کی مدت میں شمار نہیں کیا جائے گا۔