پاکستان میں انسانی ترقی کی تازہ صورتحال سامنے آگئی، بلوچستان سب سے پیچھے — ایس ڈی پی آئی رپورٹ

اسلام آباد، 4 نومبر 2025 — اسسٹین ایبل ڈیولپمنٹ پالیسی انسٹی ٹیوٹ (SDPI) نے پاکستان میں انسانی ترقی سے متعلق تازہ ترین رپورٹ جاری کر دی۔ رپورٹ کا نام "صوبائی ترقیاتی مانیٹر: مشتق انسانی ترقیاتی اشاریہ” ہے، جو ایس ڈی پی آئی کی 28ویں سسٹین ایبل ڈیولپمنٹ کانفرنس کے پہلے دن پیش کی گئی۔

یہ رپورٹ ملک کے 116 اضلاع میں حالاتِ زندگی، تعلیم اور صحت کے اشارئیے ظاہر کرتی ہے۔ رپورٹ کے مطابق پاکستان ابھی تک حالیہ بحرانوں کے اثرات سے پوری طرح نہیں سنبھل سکا۔

اعداد و شمار اور حکومتی نقطہ نظر

وفاقی وزیر منصوبہ بندی احسن اقبال نے کانفرنس سے خطاب کرتے ہوئے کہا کہ اعداد و شمار اچھی حکمرانی کی بنیاد ہیں۔ ان کا کہنا تھا کہ ترقی کے لیے درست معلومات کا ہونا بہت ضروری ہے۔

رپورٹ میں بتایا گیا کہ ڈیٹا مردم شماری 2023 اور مختلف سرکاری ریکارڈز سے حاصل کیا گیا۔ یہ ڈیٹا 2025 کے سیلاب سے پہلے کی صورتحال ظاہر کرتا ہے۔ ماہرین کے مطابق مستقبل کے ڈیٹا کے ذریعے سیلاب کے اثرات کا درست اندازہ لگایا جا سکے گا۔

پاکستان کی مجموعی کارکردگی

رپورٹ کے مطابق پاکستان کے انسانی ترقیاتی اشاریے میں مجموعی طور پر کمی آئی ہے۔

• مجموعی انسانی ترقی اشاریہ 0.699 سے کم ہو کر 0.691 ہوگیا
• صحت کے شعبے میں 0.789 سے 0.779 تک کمی
• معیارِ زندگی میں سب سے زیادہ کمی، 0.802 سے 0.772
• تعلیم کے شعبے میں بہتری، 0.539 سے بڑھ کر 0.548

رپورٹ کے مطابق اسکولوں میں داخلے اور سہولیات بہتر ہوئیں، جس کا مثبت اثر تعلیم کے شعبے پر پڑا۔

اضلاع کی درجہ بندی — کون آگے، کون پیچھے؟

بہترین اضلاع: اسلام آباد، لاہور، راولپنڈی، سیالکوٹ، ایبٹ آباد، گوجرانوالہ، ناروال، گجرات، کراچی، فیصل آباد

کمزور ترین اضلاع: خاران، نصیر آباد، زیارت، واشک، قلعہ عبداللہ، قلعہ سیف اللہ، ڈیرہ بگٹی، آواران، شیرانی، خضدار

رپورٹ کے مطابق بلوچستان کے تقریباً تمام پسماندہ اضلاع سب سے نیچے رہے۔ تعلیم، صحت اور معیارِ زندگی تینوں شعبوں میں بلوچستان شدید طور پر پیچھے ہے۔

پالیسی سازوں کے لیے پیغام

رپورٹ نے حکومت کو مشورہ دیا کہ وسائل ان علاقوں میں خرچ کیے جائیں جہاں سب سے زیادہ ضرورت ہے۔ ماہرین کا کہنا ہے کہ پسماندہ علاقوں کو فوری توجہ دی جائے تاکہ ترقی کا فرق کم کیا جا سکے۔

ایس ڈی پی آئی کے ترجمان نے کہا کہ یہ رپورٹ یاد دہانی ہے کہ بحرانوں کے باوجود ترقی کے سفر کو روکنا نہیں چاہیے۔ انہوں نے کہا کہ انصاف، وسائل کی منصفانہ تقسیم اور بہتر سماجی نظام سے ہی مسائل حل ہوں گے۔