سپریم کورٹ بار ایسوسی ایشن نے آئینی عدالت کے قیام کی حمایت کردی، ایگزیکٹو مجسٹریٹ کی بحالی پر تحفظات کا اظہار

اسلام آباد:سپریم کورٹ بار ایسوسی ایشن نے آئینی عدالت کے قیام کی مکمل حمایت کرتے ہوئے اسے وقت کی اہم ضرورت قرار دیا ہے، تاہم ستائیسویں آئینی ترمیم میں ایگزیکٹو مجسٹریٹ کی بحالی پر شدید تحفظات بھی ظاہر کیے ہیں۔

سپریم کورٹ بار ایسوسی ایشن کی نئی کابینہ نے اپنے عہدوں کا چارج سنبھال لیا۔ اس موقع پر جاری اعلامیے میں کہا گیا کہ آئینی عدالت کا قیام وکلا برادری کا دیرینہ مطالبہ تھا، جس سے عدالتی نظام کی کارکردگی بہتر بنانے اور عام شہریوں کو فوری انصاف کی فراہمی میں مدد ملے گی۔

اعلامیے میں مزید کہا گیا کہ آئینی عدالت میں وفاق اور چاروں صوبوں سے ججوں کو متناسب نمائندگی دی جانی چاہیے تاکہ قومی سطح پر عدالتی توازن برقرار رہے۔ سپریم کورٹ بار نے زور دیا کہ نئی آئینی عدالت نہ صرف آئینی نوعیت کے مقدمات کے جلد فیصلوں میں معاون ثابت ہوگی بلکہ سپریم کورٹ پر مقدمات کے دباؤ میں بھی کمی لائے گی۔

دوسری جانب ستائیسویں آئینی ترمیم میں ایگزیکٹو مجسٹریٹ کی بحالی سے متعلق مجوزہ شقوں پر سپریم کورٹ بار ایسوسی ایشن نے سخت اعتراض اٹھایا ہے۔ اعلامیے میں کہا گیا کہ ایگزیکٹو مجسٹریٹ کی بحالی آئین کے بنیادی خدوخال اور عدلیہ کی آزادی کے اصولوں کی صریحاً خلاف ورزی ہے۔

سپریم کورٹ بار کے صدر نے کہا کہ ملک کی سب سے بڑی بار ایسوسی ایشن ہونے کے ناطے وفاقی حکومت ترمیم کا مسودہ بار ایسوسی ایشن کے ساتھ شیئر کرے تاکہ وکلا برادری اپنا مؤقف اور تجاویز پیش کرسکے۔ انہوں نے کہا کہ حکومت کے ساتھ مشاورت کے بغیر اس نوعیت کی آئینی ترامیم متنازع ثابت ہو سکتی ہیں۔