سماجی ترقی کا خواب غزہ جنگ کو نظرانداز کرکے پورا نہیں ہوسکتا، صدر مملکت

دوحہ: صدرِ پاکستان آصف علی زرداری نے قطر میں عالمی سماجی ترقیاتی کانفرنس سے خطاب کرتے ہوئے کہا ہے کہ سماجی انصاف، انسانی حقوق اور برابری کے بغیر ترقی کا کوئی تصور ممکن نہیں۔

انہوں نے کہا کہ پاکستان ان اصولوں کی حمایت کرتا ہے اور ایسی دنیا چاہتا ہے جہاں غربت کا خاتمہ ہو اور ہر فرد کو باعزت روزگار کے مواقع ملیں۔

صدر آصف زرداری نے کہا کہ پالیسی سازی میں افراد کو مرکزی حیثیت دینا ضروری ہے، جبکہ پاکستان نوجوانوں کو تعلیم اور تربیت فراہم کرنے کے لیے اقدامات کر رہا ہے تاکہ وہ عالمی مواقع سے فائدہ اٹھا سکیں۔

انہوں نے کہا کہ بینظیر انکم سپورٹ پروگرام کو دنیا بھر میں بہترین سماجی تحفظ پروگرام کے طور پر تسلیم کیا گیا ہے۔

خطاب میں انہوں نے خبردار کیا کہ پانی بنیادی حق ہے اور پاکستان کو سرحد پار پانی کو ہتھیار کے طور پر استعمال کیے جانے کے خطرے کا سامنا ہے۔

ان کا کہنا تھا کہ سندھ طاس معاہدے کی خلاف ورزی سے کروڑوں پاکستانی متاثر ہوتے ہیں مگر ایسے اقدامات کامیاب نہیں ہوں گے۔

صدر مملکت نے کہا کہ سماجی ترقی کا ہدف اس وقت تک حاصل نہیں ہوسکتا جب تک غزہ میں جاری انسانی المیے اور نسل کشی کو نظرانداز کیا جاتا رہے۔

انہوں نے عالمی برادری پر زور دیا کہ جنگ بندی کو مستقل امن اور انصاف میں تبدیل کیا جائے۔ ان کے مطابق فلسطین اور کشمیر کے مسائل ایک جیسے ہیں اور اقوام متحدہ کی قراردادوں پر عملدرآمد ہی ان کا حل ہے۔