امیر قطر نے پاکستان اور سعودی عرب کے دفاعی معاہدے کو خوش آئند اور بروقت قرار دے دیا

دوحہ: صدرِ مملکت آصف علی زرداری نے قطر کے امیر شیخ تمیم بن حمد الثانی سے دوحہ میں اہم ملاقات کی، جس میں دوطرفہ تعلقات، تجارت، سرمایہ کاری اور خطے کی موجودہ صورتحال پر تبادلہ خیال کیا گیا۔ دونوں رہنماؤں نے پاکستان اور قطر کے درمیان تاریخی و برادرانہ تعلقات کو مزید وسعت دینے کے عزم کا اظہار کیا۔
امیرِ قطر نے ملاقات کے دوران کہا کہ "قطر کو پاکستان اور اس کی کامیابیوں پر فخر ہے۔” انہوں نے قطر میں مقیم پاکستانی کمیونٹی کے کردار کو سراہتے ہوئے کہا کہ وہ مستقبل میں ان کی تعداد میں خاطر خواہ اضافہ چاہتے ہیں، تاکہ دونوں ممالک کے تعلقات عوامی سطح پر مزید مضبوط ہوں۔
صدرِ مملکت آصف علی زرداری نے امیرِ قطر کو حکومتِ پاکستان اور عوام کی جانب سے نیک تمناؤں کا پیغام پہنچایا اور ان کی بصیرت افروز قیادت میں قطر کی ترقی کی تعریف کی۔ صدر زرداری نے کہا کہ "قطر خطے میں امن، استحکام اور اقتصادی تعاون کے فروغ میں کلیدی کردار ادا کر رہا ہے۔”
امیرِ قطر نے حال ہی میں ہونے والے پاکستان۔سعودی عرب دفاعی معاہدے کو خوش آئند اور بروقت اقدام قرار دیتے ہوئے کہا کہ پاکستان ایک منفرد حیثیت رکھتا ہے جو بیک وقت چین، مغرب اور خلیجی ممالک کے ساتھ مضبوط تعلقات رکھتا ہے۔
صدر زرداری نے ملاقات کے دوران دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجویز پیش کی، جس پر امیرِ قطر نے مکمل رضامندی ظاہر کرتے ہوئے متعلقہ حکام کو فوری طور پر رابطوں کے آغاز کی ہدایت دی۔
صدرِ مملکت نے دوحہ مذاکرات کی میزبانی اور افغانستان کے معاملے پر قطر کے مثبت کردار کو بھی سراہا۔ اس موقع پر امیرِ قطر نے امید ظاہر کی کہ "پاکستان اور افغانستان حالیہ چیلنجز کو پسِ پشت ڈال کر باہمی مسائل کو خوش اسلوبی سے حل کر لیں گے۔”
ملاقات کے اختتام پر امیرِ قطر نے صدرِ پاکستان کی دعوت قبول کرتے ہوئے آئندہ سال کے اوائل میں پاکستان کے دورے کا اعلان کیا۔اس اعلیٰ سطحی ملاقات میں چیئرمین پیپلز پارٹی بلاول بھٹو زرداری اور پاکستانی سفیر بھی شریک تھے۔ دونوں ممالک کے رہنماؤں نے تعلقات کو نئی بلندیوں تک لے جانے کے عزم کا اعادہ کیا۔