مولانا فضل الرحمان سے سینیٹر فیصل واوڈا کی ملاقات کی اندرونی کہانی سامنے آگئی

 جمعیت علماء اسلام (جے یو آئی) کے سربراہ مولانا فضل الرحمان سے سینیٹر فیصل واوڈا کی ملاقات کی اندرونی کہانی سامنے آگئی ہے۔

ذرائع کے مطابق ملاقات میں جمعیت علماء اسلام (جے یو آئی) کے سربراہ مولانا فضل الرحمان کو 27 ویں ترمیم سے متعلق فیصل واوڈا نے بریفنگ دی، فیصل واوڈا کا کہنا تھا کہ ملک میں جمہوریت اور پارلیمانی امور میں آپ کا ہمیشہ جاندار اور اہم کردار رہا، امید ہے اس مرتبہ بھی آپ اسی انداز سے کردار ادا کریں گے۔

مولانا فضل الرحمان کا کہنا تھا کہ اس حوالے سے میڈیا سے ہی خبریں سنیں، سوشل میڈیا پر معاملہ سامنے آیا، جے یو آئی ایک سیاسی پارلیمانی جماعت کیساتھ ایک بھرپور سیاسی قوت ہے، ہم آئین کے محافظین ہیں، آئینی ترمیم کا مسودہ پہلے سامنے آنا چاہیے۔

انہوں نے کہا کہ جب تک آئینی ترمیم کا مسودہ سامنے نہیں آتا اس وقت تک اس پر رائے کیسے دی جاسکتی ہے، مسودہ دیکھنے کے بعد پارلیمانی پارٹی، لیگل ٹیم اور شوریٰ کو بھی اعتماد میں لیں گے، جلد بازی کی بجائے تمام چیزوں کا جائزہ لیا جائیگا، آئینی ترمیم میں کیا تجاویز ہیں وہ دیکھیں گے۔

مولانا فضل الرحمان کا کہنا تھا کہ آپ ہمارے پاس تشریف لائے خوش آمدید کہتے ہیں، آئینی ترمیم کے اپنے کچھ تقاضے اور اصول ہیں، مشاورت کے بعد جس نتیجے پر پہنچے ضرور اس پر رائے دی جائیگی۔

سینیٹرفیصل واوڈا کا کہنا تھا کہ مولاجٹ کی سیاست کرنی ہے تو پھر گورنر راج، پابندی کا بھی آپشن ہے، 18ویں ترمیم کو چھیڑاجارہا ہے نہ ہی رول بیک کیاجارہاہے، بلاول جمہوریت کے ضامن اور آصف زرداری سیاسی شطرنج کے بڑے کھلاڑی ہیں۔