ٹرین میں سفر کرنے والوں کیلئے بڑی خوشخبری؛ حکومت کا اہم اعلان

وفاقی وزیر ریلوے حنیف عباسی نے کہا ہے کہ پاکستان ریلوے کے سیکیورٹی مسائل کو ترجیحی بنیادوں پر حل کیا جا رہا ہے۔

وفاقی وزیر ریلوے حنیف عباسی کا کہنا تھا کہ اس وقت ملک کے تمام بڑے ریلوے اسٹیشنز پر وائی فائی سسٹم نصب کیا جا چکا ہے، تاکہ مسافروں کو بہترین سہولت فراہم کی جا سکے۔

انہوں نے مزید بتایا کہ ریلوے اسٹیشنز پر سیکیورٹی کو مزید مضبوط کرنے کے لیے 184 جدید سیکیورٹی کیمرے نصب کیے گئے ہیں۔ ان کیمرے کی مدد سے مسافروں کی حفاظت کو یقینی بنایا جا رہا ہے۔ حنیف عباسی نے کہا کہ یہ اقدامات ملک میں ریلوے کے نظام کو جدید خطوط پر استوار کرنے کی کوششوں کا حصہ ہیں۔

حنیف عباسی نے بتایا کہ پاکستان ریلوے میں مزید بہتری کے لیے نئے اقدامات اٹھائے جا رہے ہیں۔ اس سلسلے میں 400 کلومیٹر طویل نیا ٹریک بچھانے کی منصوبہ بندی مکمل کر لی گئی ہے۔ اس نئے ٹریک کے ذریعے آمدورفت کے نظام میں انقلابی تبدیلی لانے کی توقع ہے۔

وفاقی وزیر نے فریٹ سیکٹر میں پاکستان ریلوے کی کامیابیوں کا بھی ذکر کیا۔ انہوں نے کہا کہ ریلوے نے فریٹ سروسز میں نمایاں کامیابیاں حاصل کی ہیں اور اس کے ذریعے آمدنی میں خاطر خواہ اضافہ ہوا ہے۔

حنیف عباسی نے کہا کہ ریلوے کے نظام کی بحالی، ٹرینوں کی بروقت آمدورفت اور مسافروں کی سہولت کے لیے جامع اصلاحاتی منصوبہ تیار کیا گیا ہے، جس پر بھرپور طریقے سے عمل کیا جا رہا ہے۔