کرک میں پولیس اور سی ٹی ڈی کا مشترکہ آپریشن، کالعدم تنظیم کا خطرناک کمانڈر ہلاک

پشاور: ضلع کرک کے علاقے امبیری کلہ میں پولیس اور کاونٹر ٹیررازم ڈیپارٹمنٹ (سی ٹی ڈی) نے دہشت گردوں کے خلاف مشترکہ کارروائی کی جس میں کالعدم تنظیم  کے خطرناک کمانڈر کو ایک طویل مقابلے کے بعد ہلاک کردیا۔

پولیس کے مطابق کارروائی امبیری کلہ کے علاقے میں تقریباً چار گھنٹے تک جاری رہی، مقابلے کے دوران تین پولیس اہلکار زخمی ہوئے جنہیں فوری طور پر قریبی ہسپتال منتقل کیا گیا، جہاں ان کا علاج جاری ہے۔

کالعدم تنظیم کا کمانڈر حکیم نثار دہشت گردانہ سرگرمیوں کے اس نیٹ ورک کا سرغنہ تھا جو نہ صرف صوبہ خیبر پختونخوا بلکہ پاکستان میں خودکش دھماکوں ، ٹارگٹ کلنگ جیسی دہشت گردانہ کارروائیوں میں ملوث تھا۔

                انسپکٹر جنرل آف پولیس خیبر پختونخوا ذوالفقار حمید نے کرک پولیس، سی ٹی ڈی اور دیگر قانون نافذ کرنیوالے اداروں کی بہادری اور پیشہ ورانہ صلاحیتوں کو سراہتے ہوئے کہا کہ انہوں نے ہمیشہ مشکل ترین حالات میں دہشت گردوں کا دلیری سے مقابلہ کیا ہے۔

آئی جی پی نے کہا کہ کرک پولیس نے اپنی جانوں کی پرواہ کیے بغیر عوام کے جان و مال کے تحفظ کے لیے مثالی کردار ادا کیا۔

                آئی جی پی خیبرپختونخوا ذوالفقار حمید نے زخمی اہلکاروں کی جلد صحتیابی کی دعا کی اور کہا کہ ان کی خدمات اور قربانیاں پولیس فورس کے لیے قابلِ فخر سرمایہ ہیں اور کہا کہ دہشت گردی کے خاتمے تک پولیس کا عزم غیر متزلزل ہے اور ہر محاذ پر دہشت گردوں کو ناکامی کا سامنا کرنا پڑے گا۔

انہوں نے پولیس ٹیم کے لیے تعریفی اسناد اور انعامات دینے کا اعلان بھی کیا۔