صدر مملکت کا مقبوضہ کشمیریوں کے حق خود ارادیت کیلئے غیرمتزلزل حمایت کا اعادہ

اسلام آباد: صدر مملکت آصف علی زرداری نے مقبوضہ کشمیریوں کے حق خود ارادیت کیلئے غیرمتزلزل حمایت کا اعادہ کیا۔

صدر مملکت آصف علی زرداری نے شہدائے جموں پر پیغام جاری کرتے ہوئے کہا کہ یہ واقعہ برصغیر کی تاریخ کا بدترین انسانی المیہ تھا، جس نے نہ صرف جموں و کشمیر کے عوام پر سنگین اثرات مرتب کیے بلکہ خطے کی آبادیاتی ساخت کو بھی بدل کر رکھ دیا۔

انہوں نے کہا کہ سانحہ جموں نے بھارت کے غیر قانونی قبضے اور کشمیریوں پر مظالم کو بے نقاب کیا، اور بھارت کی جانب سے مقبوضہ کشمیر میں غیر مقامی افراد کی آبادکاری اور کشمیری شناخت کو مٹانے کی کوششیں اسی پالیسی کا تسلسل ہیں۔

ان کا کہنا تھا کہ مقبوضہ کشمیر میں بھارت کی تقریباً 10 لاکھ فوج تعینات ہے، جس نے کشمیر کو ایک بڑے عسکری خطے میں تبدیل کردیا ہے۔

صدر نے عالمی برادری سے اپیل کی کہ وہ بھارت کے ان جرائم پر خاموش نہ رہے اور ان کا محاسبہ کرے۔

آصف علی زرداری نے کہا کہ عالمی برادری کو جموں کے قتل عام کو نسل کشی کے طور پر تسلیم کرنا چاہیے، کشمیریوں کی ایک اور نسل ظلم، جبر، جبری بے دخلی اور محرومی کا سامنا کر رہی ہے۔

انہوں نے اپنے پیغام میں مقبوضہ کشمیر کے عوام کے حق خود ارادیت کے لیے پاکستان کی غیر متزلزل حمایت کا اعادہ کیا اور کہا کہ پاکستان کشمیری عوام کی جدوجہد آزادی میں ہمیشہ ان کے ساتھ رہے گا، پاکستان کشمیری عوام کو ہر ممکن اخلاقی، سفارتی اور سیاسی تعاون فراہم کرتا رہے گا۔

ان کا مزید کہنا تھا کہ عالمی برادری کو کشمیر کے مسئلے کو فوری طور پر حل کرنے کے لیے اپنی ذمہ داریوں کو نبھانا چاہیے۔