6 نومبر کا دن کشمیریوں کے ذہنوں پر 8 دہائیوں کے بعد بھی ایک تازہ زخم کی طرح موجود ہے، وزیراعظم

اسلام آباد: وزیراعظم شہباز شریف نے کہا ہے کہ 6 نومبر کا دن کشمیریوں کے ذہنوں پر 8 دہائیوں کے بعد بھی ایک تازہ زخم کی طرح موجود ہے۔

وزیراعظم شہباز شریف نے 6 نومبر 1947 کو ہونے والے سانحہ جموں کی یاد میں اپنے پیغام میں کہا کہ یہ دن جموں و کشمیر کی تاریخ کا ایک سیاہ ترین دن ہے، جو کشمیریوں کے ذہنوں پر 8 دہائیوں کے بعد بھی ایک تازہ زخم کی طرح موجود ہے۔

انہوں نے کہا کہ یہ دن کشمیریوں کی لازوال بہادری اور آزادی کی جدوجہد کے لئے غیر متزلزل عزم کا مظہر ہے۔

ان کا کہنا تھا کہ بھارتی فوج اور شدت پسندوں نے 2 لاکھ 37 ہزار کشمیریوں کو بے رحمانہ تشدد اور نسل کشی کا نشانہ بنایا، جس کے نتیجے میں جموں و کشمیر کی آبادیاتی اور مذہبی اکثریت کو اقلیت میں بدلنے کی کوشش کی گئی۔

شہباز شریف نے اس عمل کی بھرپور مذمت کرتے ہوئے کہا کہ پاکستان اور انسانی حقوق کے علمبردار اس سنگین ظلم کی مذمت کرتے ہیں۔

وزیراعظم نے کہا کہ حکومت اور عوام کشمیری بھائیوں اور بہنوں کی قربانیوں کو خراج تحسین پیش کرتے ہیں اور ان کے حق خود ارادیت کے لئے ان کی حمایت جاری رکھتے ہیں۔

انہوں نے کہا کہ ہم عالمی سفارتی محاذ پر مسئلہ کشمیر کو اجاگر کرتے رہیں گے اور پاکستان کشمیری عوام کے ساتھ اپنے سیاسی، سفارتی اور اخلاقی تعاون کو مزید مستحکم رکھے گا۔

وزیراعظم نے عالمی برادری سے مطالبہ کیا کہ وہ مسئلہ کشمیر کے حل میں اپنی ذمہ داریوں کو پورا کرے اور کشمیری عوام کے حقوق کا تحفظ کرے۔