سرکاری ملازمین کو دہری شہریت یا نوکری میں سے ایک کا انتخاب کرنا ہوگا، 27ویں آئینی ترمیم کی تجویز

وفاقی حکومت نے 27ویں آئینی ترمیم کے ذریعے ایک نیا آرٹیکل شامل کرنے کی تجویز دی ہے جس کے تحت سرکاری ملازمین کو دہری شہریت یا نوکری میں سے ایک کا انتخاب کرنا ہوگا۔

ذرائع کے مطابق، یہ ترمیم اس مقصد سے لائی جارہی ہے کہ جیسے پبلک آفس ہولڈر دہری شہریت نہیں رکھ سکتا، ویسے ہی سول سرونٹس کو بھی دہری شہریت کی اجازت نہ ہو۔ حکومت نے اس کے لیے آئین کے آرٹیکل 63 ون (سی) کا حوالہ دیا ہے۔

حکومت کے مؤقف کے مطابق، دہری شہریت رکھنے والے افراد سے ریاستی وفاداری پر سوال اٹھ سکتے ہیں۔ اسی لیے سول سرونٹس کے لیے یہ قانون ضروری سمجھا جا رہا ہے۔

پیپلزپارٹی کی مرکزی مجلس عاملہ (سی ای سی) کے اجلاس میں اس ترمیم پر تفصیلی غور جاری ہے۔ ذرائع کا کہنا ہے کہ پارٹی کے زیادہ تر ارکان اس ترمیم کی حمایت کر رہے ہیں۔

مجوزہ 27ویں ترمیم کے تحت صرف دہری شہریت کا معاملہ ہی نہیں بلکہ کئی دیگر اہم نکات بھی شامل ہیں۔ ترمیم میں آرٹیکل 243 میں تبدیلی کی تجویز ہے تاکہ فیلڈ مارشل کے عہدے کو آئینی طور پر تسلیم کیا جاسکے۔

اس کے علاوہ، مجوزہ ترمیم میں آئینی عدالتوں کی تشکیل، مجسٹریل اختیارات کی تقسیم اور پورے ملک میں ایک نصاب رائج کرنے جیسے نکات بھی زیر غور ہیں۔

ذرائع کے مطابق حکومت کا ارادہ ہے کہ یہ ترمیمی بل آئندہ ہفتے پارلیمنٹ کے دونوں ایوانوں سے منظور کرایا جائے۔

حکومتی حلقوں کا کہنا ہے کہ دہری شہریت رکھنے والے ملازمین پر آئندہ سختی کی جائے گی تاکہ ریاستی امور میں مکمل شفافیت اور وفاداری کو یقینی بنایا جاسکے۔