گاڑی مالکان ہوجائیں ہوشیار؛ بڑی کارروائی کا حکم سامنے آگیا

لاہور ہائیکورٹ نے دھواں چھوڑنے والی گاڑیوں کے خلاف سخت کارروائی کرنے کا حکم دے دیا ہے۔

اسموگ تدارک کے کیس کی سماعت کے دوران فاضل جج نے کہا کہ ای پی اے (ماحولیات کے تحفظ کا ادارہ) کے افسران کو سڑکوں پر مانیٹرنگ کرتے ہوئے گاڑیوں کا معائنہ کرنا چاہیے۔ جج صاحب نے ریمارکس دیے کہ ای پی اے کے افسران سڑکوں پر کھڑے ہو کر خود یہ دیکھیں کہ کون سی گاڑیاں دھواں چھوڑ رہی ہیں۔

عدالت نے کہا کہ گزشتہ دو تین روز میں ایئر کوالٹی انڈیکس (اے کیو آئی) میں بہتری آئی ہے اور اس کو برقرار رکھنا ضروری ہے۔ اس حوالے سے عدالت نے ای پی اے کے افسران سے ان کے ڈیوٹی روسٹرز طلب کر لیے ہیں اور انہیں لاہور سمیت موٹرویز کے داخلی اور خارجی راستوں پر تعینات کرنے کی ہدایت کی ہے۔

جج صاحب نے کہا کہ جب وہ سڑکوں پر نکلتے ہیں تو درجنوں گاڑیاں دھواں چھوڑتی دکھائی دیتی ہیں۔ انہیں حیرانی ہوتی ہے کہ ای پی اے کے افسران کو یہ گاڑیاں کیوں نہیں نظر آتیں؟ اس پر عدالت نے سختی سے حکم دیا کہ دھواں چھوڑنے والی گاڑیوں کے خلاف قانونی کارروائی کی جائے۔

عدالت نے اس کے ساتھ ہی شہر بھر میں بینرز آویزاں کرنے کی ہدایت بھی دی تاکہ عوام کو اس حوالے سے آگاہ کیا جا سکے۔ مزید یہ کہ ٹریفک پولیس کو بھی اس مہم میں شامل کرنے کا حکم دیا گیا ہے تاکہ سڑکوں پر دھواں چھوڑنے والی گاڑیوں کے خلاف کارروائی کو مؤثر بنایا جا سکے۔

ممبر جوڈیشل کمیشن نے عدالت کو بتایا کہ حالیہ دنوں میں ساٹھ ٹن کاربن والے ٹرک پکڑے گئے ہیں اور سولہ غیر قانونی رکشہ ورکشاپس بھی سیل کی جا چکی ہیں۔ عدالت نے ہدایت کی کہ لاہور سمیت پورے پنجاب میں اس حوالے سے کارروائیاں تیز کی جائیں اور آئندہ دو ہفتوں کے اندر کسی بھی دھواں چھوڑتی گاڑی کو سڑکوں پر نہ دیکھا جائے۔