ہفتہ، 29-نومبر،2025
ہفتہ 1447/06/08هـ (29-11-2025م)

باکو میں آذربائیجان کے یومِ فتح کی شاندار تقریب، وزیراعظم شہباز شریف اور ترک صدر کی خصوصی شرکت

08 نومبر, 2025 15:00

آذربائیجان کے دارالحکومت باکو میں یومِ فتح کی پانچویں سالگرہ کے موقع پر شاندار تقریب کا انعقاد کیا گیا، جس میں وزیر اعظم پاکستان شہباز شریف اور ترک صدر رجب طیب اردوان نے خصوصی طور پر شرکت کی۔

تقریب سے خطاب کرتے ہوئے صدر آذربائیجان الہام علیوف نے پوری قوم کو یومِ فتح کی مبارکباد پیش کی اور کہا کہ پاکستان اور ترکیہ نے مشکل وقت میں آذربائیجان کا جس خلوص کے ساتھ ساتھ دیا، اسے کبھی فراموش نہیں کیا جائے گا۔

صدر علیوف نے کہا کہ 2020 کی 44 روزہ جنگ ہماری بہادری، عزم اور کامیابی کی روشن داستان ہے، آذربائیجان کی افواج نے میدانِ جنگ میں اپنی صلاحیتوں کا لوہا منوایا اور شوشا شہر کی آزادی ہماری عظیم فتح تھی۔

ان کا کہنا تھا کہ آرمینیا کے ساتھ امن معاہدہ ہمارے مؤقف کی کامیابی کا ثبوت ہے۔صدر آذربائیجان نے مزید کہا کہ ملک اپنی معاشی اور سیاسی آزادی کو برقرار رکھتے ہوئے دفاع سمیت تمام شعبوں میں ترقی کے سفر کو جاری رکھے گا، پائیدار ترقی و خوشحالی ہماری منزل ہے۔

ترک صدر کا خطاب 

ترک صدر رجب طیب اردوان نے تقریب سے خطاب میں کہا کہ آذربائیجان کی حکومت اور عوام کو یومِ فتح کی دل کی گہرائیوں سے مبارکباد پیش کرتے ہیں۔

انہوں نے کہا کہ آذربائیجان نے صدر الہام علیوف کی قیادت میں ہر میدان میں شاندار کامیابیاں حاصل کیں، اور کاراباخ کی فتح سے ناانصافی کے ایک دور کا خاتمہ ہوا۔

ان کا کہنا تھا کہ ہم تینوں ممالک، پاکستان، ترکیہ اور آذربائیجان، ایک خاندان کی مانند ہیں، اور ہمیں اتحاد و یکجہتی سے آگے بڑھنا ہے۔

وزیر اعظم پاکستان کا خطاب

وزیر اعظم پاکستان شہباز شریف نے اپنے خطاب میں کہا کہ یومِ فتح کی تقریب میں شرکت میرے لیے باعثِ اعزاز ہے۔

انہوں نے کہا کہ پاکستانی عوام کی جانب سے آذربائیجان کی حکومت اور عوام کو دل کی گہرائیوں سے مبارکباد پیش کرتا ہوں۔

ان کا کہنا تھا کہ پاکستان، ترکیہ اور آذربائیجان کے دل ایک ساتھ دھڑکتے ہیں، تینوں برادر ملکوں نے ہر موقع پر اپنی دوستی اور یکجہتی کا ثبوت دیا ہے۔

وزیر اعظم نے کہا کہ آذربائیجان کی بہادر افواج نے عزم، حوصلے اور قربانی سے آزادی حاصل کی۔

شہباز شریف نے تقریب میں علامہ اقبال کا شعر بھی پڑھ کر سنایا اور کہا کہ آزادی کے لیے جدوجہد، عزم اور حوصلہ لازمی عناصر ہیں۔

انہوں نے کہا کہ پاکستان نے آذربائیجان کے منصفانہ مؤقف کی ہمیشہ بھرپور حمایت کی، بھارتی جارحیت کے دوران ترکیہ اور آذربائیجان نے پاکستان سے بھرپور یکجہتی کا مظاہرہ کیا جس پر ہم شکر گزار ہیں۔

ان کا مزید کہنا تھا کہ افواجِ پاکستان نے دشمن کے دانت کھٹے کیے، اور دشمن کے سات بہترین جنگی طیارے مار گرائے۔

Catch all the پاکستان News, Breaking News Event and Trending News Updates on GTV News


Join Our Whatsapp Channel GTV Whatsapp Official Channel to get the Daily News Update & Follow us on Google News.

اوپر تک سکرول کریں۔