وزیر قانون اعظم نذیر تارڑ نے سینیٹ میں 27 ویں آئینی ترمیم کا بل پیش کر دیا

اسلام آباد: وفاقی وزیر قانون اعظم نذیر تارڑ نے سینیٹ میں 27ویں آئینی ترمیم کا بل پیش کر دیا۔

چیئرمین سینیٹ یوسف رضا گیلانی کی زیر صدارت اجلاس میں وفاقی وزیر قانون اعظم نذیر تارڑ نے کہا کہ بل پہلے پارلیمنٹ کی مشترکہ کمیٹی کو بھیجا جائے گا۔ کمیٹی اپنا جائزہ لے گی اور اس پر مفصل بحث ہوگی۔ انہوں نے مزید کہا کہ ابھی بل پر ووٹ نہیں ہوگا اور اپوزیشن سے تبادلہ خیال کا آغاز کیا جائے گا۔ چیئرمین سینیٹ نے بھی اپوزیشن کو کہا کہ وہ کمیٹی کے اجلاس میں حصہ لیں۔

وزیر قانون نے بتایا کہ کابینہ کی منظوری کے بعد بل کو جوائنٹ کمیٹی میں پیش کیا گیا۔ بل میں وفاقی آئینی عدالت کے قیام کی تجویز شامل ہے۔ اعظم نذیر تارڑ نے کہا کہ ججز کی تعیناتی اور تبادلے کا معاملہ جوڈیشل کمیشن کے سپرد ہوگا۔

انہوں نے مزید کہا کہ قانون سازی میں اتحادی جماعتوں سے مشاورت بھی کی جا رہی ہے۔ چارٹر آف ڈیموکریسی کے تحت آئینی عدالت کے قیام پر اتفاق رائے موجود ہے۔

وزیر قانون نے آرٹیکل 243 کے حوالے سے بھی بات کی۔ انہوں نے کہا کہ ماضی کے تجربات نے ہمیں بہت کچھ سکھایا ہے، خاص طور پر دفاعی اور اسٹریٹجک معاملات میں۔ حالیہ پاک بھارت کشیدگی نے بھی اہم سبق دیے ہیں۔ انہوں نے بتایا کہ بعض اہم عہدے جیسے فیلڈ مارشل، ایئر چیف اور نیول چیف کے لیے رینک اور اعزازات کو آئینی بل میں شامل کیا جائے گا تاکہ یہ اعزازات ہمیشہ برقرار رہیں۔

اعظم نذیر تارڑ نے کہا کہ آئینی ترامیم دو تہائی اکثریت سے منظور ہوں گی اور پھر یہ آئین کا حصہ بن جائیں گی۔

سینیٹر شیری رحمان کا خطاب

سینیٹر شیری رحمان نے کہا کہ آئینی ترامیم ایوانوں کا جمہوری حق ہوتا ہے، 18 ویں ترمیم پر ایک سال تک بحث ہوئی تھی۔

انہوں نے کہا کہ این ایف سی پیپلز پارٹی لے کر آئی جس سے صوبوں کو حقوق ملے، پیپلز پارٹی کھڑی رہی اور اب بھی کھڑی ہے۔

ان کا کہنا تھا کہ بل کا مطالعہ کرلیں، 18ویں ترمیم رول بیک نہیں ہورہی۔