ڈرائیونگ لائسنس بنوانے والوں کیلئے بڑی خبر آگئی

پنجاب حکومت نے صوبے بھر میں ٹریفک قوانین کی خلاف ورزیوں کو روکنے کے لیے ایک نیا ڈرائیونگ لائسنس پوائنٹس سسٹم متعارف کروا دیا ہے۔

 اس نئے نظام کے تحت ٹریفک قوانین کی خلاف ورزی پر ڈرائیور کے لائسنس سے 2 سے 4 پوائنٹس کی کٹوتی کی جائے گی، اور ساتھ ہی جرمانہ بھی عائد ہوگا۔ یہ نظام دبئی جیسے جدید ٹریفک ماڈلز سے متاثر ہے، جس کا مقصد سڑکوں پر محتاط اور محفوظ ڈرائیونگ کو فروغ دینا ہے۔

نئے سسٹم کے تحت اگر کسی ڈرائیور کے لائسنس سے ایک سال کے دوران 20 پوائنٹس کٹ جائیں، تو اس کا لائسنس 2 ماہ سے 1 سال تک معطل کیا جا سکتا ہے۔ لائسنس کی معطلی کا انحصار خلاف ورزی کی شدت اور تعداد پر ہوگا۔ ٹریفک حکام کا کہنا ہے کہ یہ اقدام ٹریفک قوانین کی پابندی کو بڑھانے اور سڑکوں پر حادثات کی تعداد کو کم کرنے کے لیے اٹھایا گیا ہے۔

اس نئے سسٹم کے تحت تیز رفتاری، سگنل توڑنے اور دیگر سنگین خلاف ورزیوں پر 4 پوائنٹس کی کٹوتی کے ساتھ جرمانہ بھی عائد کیا جائے گا۔ ٹریفک پولیس کا کہنا ہے کہ اس نئے سسٹم کا مقصد شہریوں میں قانون کی پاسداری اور محفوظ ڈرائیونگ کے حوالے سے آگاہی پیدا کرنا ہے، تاکہ مالی جرمانوں کے ساتھ ساتھ عملی احتساب بھی کیا جا سکے۔

اس کے علاوہ پنجاب میں ڈرائیونگ لائسنس کے لیے فیس کا تعین بھی کر دیا گیا ہے۔ پنجاب میں کار کے ڈرائیونگ لائسنس کی کل لاگت ایک سال کے لیے 1,830 روپے مقرر کی گئی ہے، جس میں ٹیسٹ فیس 150 روپے، کامیاب ہونے کے بعد 1,350 روپے اور کورئیر فیس 480 روپے شامل ہیں۔

ڈرائیونگ لائسنس حاصل کرنے کے لیے امیدواروں کو پہلے 500 روپے فیس کے عوض لرنر لائسنس آن لائن حاصل کرنا ہوگا۔ اس کے بعد تھیوری اور عملی امتحان پاس کرنے پر باقاعدہ لائسنس جاری کیا جائے گا۔ ڈرائیونگ لائسنس ایک سے پانچ سال تک کی مدت کے لیے جاری کیا جا سکتا ہے، اور فیس اس مدت کے حساب سے مختلف ہوگی۔