ای چالان سے پریشان عوام کیلئے ایک اور بُری خبر؛ جرمانوں میں بڑا اضافہ ہوگیا

کراچی کے بعد حیدرآباد میں بھی ٹریفک قوانین کی خلاف ورزی کرنے والوں پر بھاری جرمانے عائد کرنے کا فیصلہ کیا گیا ہے۔

 پولیس حکام کے مطابق حکومت نے شہر میں نئے جرمانوں کا نفاذ کر دیا ہے تاکہ شہریوں میں قانون کی پابندی کو بڑھایا جا سکے اور ٹریفک کے نظام کو بہتر بنایا جا سکے۔

حکام نے اعلان کیا ہے کہ اب بغیر ڈرائیونگ لائسنس گاڑی چلانے پر 2500 روپے کی بجائے 20 ہزار روپے کا جرمانہ عائد کیا جائے گا۔ یہ فیصلہ ٹریفک قوانین کی خلاف ورزیوں کو روکنے اور شہریوں کو قوانین کی اہمیت کا احساس دلانے کے لیے کیا گیا ہے۔

اسی طرح، اگر موٹرسائیکل سوار ہیلمیٹ نہ پہنے، تو اس پر 500 کی بجائے 5 ہزار روپے جرمانہ کیا جائے گا۔ حیدرآباد میں بھی شہر کے مختلف مقامات پر "نو پارکنگ” کی خلاف ورزی کرنے والوں کو 2 ہزار کی بجائے 10 ہزار روپے جرمانہ ادا کرنا ہوگا۔

اس کے علاوہ، تیز رفتاری پر بھی سخت کارروائی کی جائے گی۔ پہلے جہاں 2500 روپے جرمانہ تھا، اب اس کی رقم بڑھا کر 25 ہزار روپے کر دی گئی ہے۔ ون وے کی خلاف ورزی کرنے والوں کو بھی 25 ہزار روپے کا جرمانہ ادا کرنا پڑے گا۔

پولیس کے مطابق بغیر نمبر پلیٹ گاڑی چلانے والوں پر بھی 5 ہزار روپے کا جرمانہ عائد کیا جائے گا۔ حکام نے شہریوں سے اپیل کی ہے کہ وہ ٹریفک قوانین کی پیروی کریں اور سڑکوں پر اپنی ذمہ داریوں کا احساس کرتے ہوئے ٹریفک قوانین کی پاسداری کریں۔