علامہ اقبال کی تعلیمات ہمیں اپنی تقدیر بدلنے اور عظمت کی راہ پر گامزن ہونے کا حوصلہ دیتی ہیں، وزیراعظم

اسلام آباد: وزیراعظم شہباز شریف نے کہا ہے کہ علامہ اقبال کی تعلیمات ہمیں اپنی تقدیر بدلنے اور عظمت کی راہ پر گامزن ہونے کا حوصلہ دیتی ہیں۔

تفصیلات کے مطابق وزیراعظم پاکستان شہباز شریف نے مفکرِ پاکستان ڈاکٹر علامہ محمد اقبال ؒ کے یومِ پیدائش کے موقع پر قوم کے نام اپنے پیغام میں انہیں خراجِ عقیدت پیش کیا۔

انہوں نے کہا کہ علامہ اقبال صاحب بصیرت شاعر، فلسفی اور بلند پایہ شخصیت تھے جنہوں نے نہ صرف برصغیر کے مسلمانوں کو اپنی علیحدہ شناخت کا ادراک دیا بلکہ ایک علیحدہ وطن کا خواب بھی روشن کیا۔

ان کا کہنا تھا کہ علامہ اقبال کی تعلیمات ہمارے لیے بحیثیت قوم ترقی اور خوشحالی کے لیے جدوجہد کرنے کا باعث ہیں۔ اقبال نے خود انحصاری، خود آگاہی اور اتحاد کی اہمیت پر زور دیا۔ ان کی شاعری صرف اپنے وقت کی عکاس نہیں بلکہ عمل اور خود شناسی کی لازوال دعوت ہے۔

شہباز شریف نے کہا کہ علامہ اقبال کے افکار اور تحریروں نے نہ صرف برصغیر بلکہ پوری دنیا پر گہرا اثر ڈالا ہے، ان کے فلسفے اور شاعری نے مسلمانوں کو ایک نئے عزم و حوصلے سے روشناس کرایا اور ان کی سوچ نے پاکستان کے قیام کی بنیاد رکھی۔

وزیراعظم کا کہنا تھا کہ علامہ اقبال نے نوجوانوں پر غیر متزلزل ایمان اور محنت کو اپنا شعار بنانے پر زور دیا، ان کی تعلیمات ہمیں اپنی تقدیر بدلنے اور عظمت کی راہ پر گامزن ہونے کا حوصلہ دیتی ہیں۔

انہوں نے کہا کہ ہم سب اقبال کی تعلیمات کو مجسم کرکے نئی امید اور عزم کے ساتھ آگے بڑھیں گے، تاکہ پاکستان کے اتحاد، امن اور خوشحالی کے لیے کام کیا جا سکے۔

وزیراعظم نے اپنے پیغام میں ڈاکٹر اقبال کی فکری وراثت کو زندہ رکھنے اور ان کے فلسفے کے مطابق قوم کو ترقی کی راہ پر گامزن کرنے کا عزم کیا۔