ہم علامہ اقبالؒ کے اصولوں پر چل کر خوشحال اور متحد پاکستان بنائیں گے، صدر مملکت

اسلام آباد: صدر مملکت آصف علی زرداری نے کہا ہے کہ ہم علامہ اقبالؒ کے اصولوں پر چل کر خوشحال اور متحد پاکستان بنائیں گے۔

تفصیلات کے مطابق صدر پاکستان آصف علی زرداری نے مفکرِ پاکستان، شاعر مشرق ڈاکٹر علامہ محمد اقبال ؒ کے یومِ پیدائش کے موقع پر اپنے پیغام میں اقبالؒ کی خدمات کو خراج تحسین پیش کیا۔

انہوں نے کہا کہ شاعر مشرق علامہ اقبالؒ کے وژن نے مسلمانوں میں آزادی کا شعور بیدار کیا اور ان کی فکر نے مسلمانوں کو ایک آزاد مملکت کے قیام کی راہ دکھائی۔

ان کا کہنا تھا کہ اقبالؒ کے افکار نے نہ صرف مسلمانوں کو اپنے حقوق کا شعور دیا بلکہ آزاد مملکت کے قیام کی راہ بھی ہموار کی، ان کے پیغام نے مسلمانوں کو علیحدہ وطن کی جدوجہد پر آمادہ کیا اور ہمیں اپنی آزادی کی اہمیت کا ادراک کرایا۔

آصف علی زرداری نے کہا کہ اقبالؒ کے افکار میں اسلامی اقدار اور روحانی احیاء پر زور دیا گیا، جو آج بھی مسلمانوں کے لیے رہنمائی کا باعث ہیں،ان کی شاعری نے نہ صرف ہمیں سیاسی آزادی کی اہمیت بتائی بلکہ انسان کی اندرونی روحانیت کو بھی اجاگر کیا۔

صدر مملکت کا کہنا تھا کہ اقبالؒ کا وژن آج بھی ہمارے نوجوانوں کے لیے مشعلِ راہ ہے، ان کی تعلیمات اور خیالات کو سمجھ کر ہم اپنی تقدیر کو بدلنے کی کوشش کریں گے۔

انہوں نے نے اپنے پیغام کے آخر میں کہا کہ ہم اقبالؒ کے اصولوں پر چل کر خوشحال اور متحد پاکستان بنائیں گے، جو ان کی فکری وراثت کا حقیقی عکاس ہو گا۔