بے نظیر انکم سپورٹ پروگرام کے مستحقین کیلئے بُری خبر سامنے آگئی

بینظیر انکم سپورٹ پروگرام (بی آئی ایس پی) میں رقم کی ادائیگی کے دوران ہونے والی کٹوتی کی ویڈیو سوشل میڈیا پر وائرل ہو گئی ہے۔

 ویڈیو میں دیکھا جا سکتا ہے کہ خواتین کو بی آئی ایس پی کی پوری رقم دی گئی، لیکن ویڈیو بیان کے بعد اس رقم میں سے کٹوتی کرلی گئی۔ اس ویڈیو کے منظر عام پر آنے کے بعد حکام نے فوری طور پر اس معاملے کی تحقیقات شروع کر دی ہیں۔

دکانداروں نے خواتین کو بی آئی ایس پی کی رقم گھروں میں جا کر ادا کی، لیکن ویڈیو کے ذریعے یہ ثابت ہوا کہ ان کی رقم میں کٹوتی کی گئی تھی۔ اس معاملے پر اے سی ندیم بلوچ نے کہا کہ اس ایجنٹ کے خلاف قانونی کارروائی کی جا رہی ہے، تاکہ اس قسم کے فراڈ کو روکا جا سکے۔

اس سے پہلے اگست میں ایک اور اسکینڈل سامنے آیا تھا، جس میں انکشاف ہوا تھا کہ بینظیر انکم سپورٹ پروگرام سے سرکاری افسران کو اربوں روپے کے کیش ٹرانسفر کیے گئے۔ اس پر پبلک اکاؤنٹس کمیٹی نے ایف آئی اے کو ان افسران کے خلاف کارروائی کرنے کا حکم دیا تھا۔

پبلک اکاؤنٹس کمیٹی کی ذیلی کمیٹی کے اجلاس میں بتایا گیا کہ سرکاری افسران کو بی آئی ایس پی سے 23 ارب 68 کروڑ روپے کیش ٹرانسفر کیے گئے۔ ان افسران میں گریڈ 16 سے 22 کے افسران سمیت 20 گریڈ کے 85 افسران اور گریڈ 19 کے 630 افسران بھی شامل تھے۔ ایک سال کے دوران ان افسران نے بی آئی ایس پی سے 7 ہزار روپے فی کس وصول کیے۔

آڈٹ رپورٹ میں بتایا گیا کہ 12 ہزار 232 ملازمین نے 14 کروڑ 67 لاکھ روپے وصول کیے، 21 ہزار سے زائد ملازمین نے 36 کروڑ 96 لاکھ روپے حاصل کیے، اور 2427 ملازمین، پنشنرز اور بیواؤں نے 3 کروڑ 77 لاکھ روپے وصول کیے۔

اس اسکینڈل پر پبلک اکاؤنٹس کمیٹی کے کنوینر معین عامر پیرزادہ نے سخت برہمی کا اظہار کیا۔ انہوں نے کہا کہ بی آئی ایس پی سے رقوم لینے والے افسران کو شرم آنی چاہیے اور انہیں نوکریوں سے فارغ کر دینا چاہیے۔ کمیٹی نے ایف آئی اے کو گریڈ 16 سے 22 تک کے افسران کے خلاف کرمنل کارروائی کرنے اور گریڈ 15 تک کے ملازمین سے رقم کی ریکوری کرنے کا حکم دیا ہے۔