کسان خوشحال ہوگا تو ملک خوشحال ہوگا، بلاول بھٹو

چیئرمین پیپلز پارٹی بلاول بھٹو زرداری نے کہا ہے کہ اگر کسان خوشحال ہوگا تو پورا ملک خوشحال ہوگا۔

چیئرمین پیپلز پارٹی بلاول بھٹو زرداری نے لاڑکانہ میں کسانوں کے لیے منعقدہ تقریب سے خطاب کرتے ہوئے کہا کہ ملک کی معیشت مسلسل نقصان میں جا رہی تھی۔ آئی ایم ایف کے دباؤ پر صوبائی حکومتوں کے اختیارات محدود کر دیے گئے تھے۔

ان کے مطابق کسانوں کے لیے یوریا اور بجلی کے بل بہت بڑھ گئے تھے جس سے کاشتکار طبقہ پریشان تھا۔

انہوں نے کہا کہ سندھ حکومت نے ہمیشہ کسانوں کے لیے عملی اقدامات کیے ہیں۔ حکومت اب کسانوں کی مدد کے لیے یوریا اور ڈی اے پی کھاد کا خرچ خود برداشت کرے گی۔ ایک سے پچیس ایکڑ تک زمین رکھنے والے کسانوں کو مالی مدد فراہم کی جائے گی۔

بلاول بھٹو نے بتایا کہ سندھ کے 90 فیصد کسانوں کو بینظیر ہاری کارڈ کے ذریعے سہولت دی جا رہی ہے۔ اس پروگرام کے تحت کاشتکاروں کو رعایتی قیمت پر کھاد اور دیگر ضروری اشیا مل رہی ہیں۔

انہوں نے کہا کہ وزیر اعظم شہباز شریف نے سندھ حکومت کی درخواست پر سیلاب سے متاثرہ کسانوں کے بجلی کے بل معاف کیے، جس سے ہزاروں کاشتکاروں کو ریلیف ملا۔

پیپلز پارٹی کے چیئرمین نے کہا کہ وفاقی حکومت سے کلائمیٹ اور ایگری کلچر ایمرجنسی نافذ کرنے کی درخواست کی گئی تھی۔ ان کا کہنا تھا کہ اگر دوسرے صوبے بھی اپنے کسانوں کی مدد کریں تو ملک کی معیشت مضبوط ہو سکتی ہے۔

بلاول بھٹو نے اپنی تقریر میں آئینی ترامیم کا بھی ذکر کیا۔ انہوں نے کہا کہ پیپلز پارٹی نے مشاورت سے آئینی ترمیم منظور کرائی ہے۔ ان کے مطابق آئین ذوالفقار علی بھٹو کی امانت ہے اور پارٹی نے اس میں موجود کمی کو پورا کر دیا ہے۔

انہوں نے بتایا کہ اب آئینی عدالتوں میں تمام صوبوں کی برابر نمائندگی ہوگی تاکہ کوئی صوبہ خود کو محروم نہ سمجھے۔