اہم سیاسی مذاکرات کامیاب، 27 ویں آئینی ترمیم کا حتمی مسودہ تیار

اسلام آباد: حکومت اور پاکستان پیپلز پارٹی کے درمیان طویل مذاکرات کے بعد 27ویں آئینی ترمیم کا مسودہ حتمی شکل اختیار کر گیا ہے۔

وفاقی وزیر قانون اعظم نذیر تارڑ نے بتایا کہ مسودے میں چھوٹی موٹی تبدیلیاں کی گئی ہیں اور اب یہ پرنٹنگ کے لیے بھیج دیا گیا ہے۔ انہوں نے کہا کہ مسودہ اب قانونی عمل کے اگلے مراحل کے لیے تیار ہے۔

اس سے پہلے پیپلز پارٹی اور مسلم لیگ ن کے درمیان کئی معاملات پر اختلاف رہا۔ خاص طور پر وفاقی آئینی عدالت کے چیف جسٹس کے تقرر کا معاملہ دونوں پارٹیوں کے درمیان تنازعہ کا باعث تھا۔

پیپلز پارٹی نے چیف جسٹس کے تقرر سے متعلق لیگی تجویز پر تحفظات ظاہر کیے، جبکہ ن لیگ نے آئینی عدالت کے سربراہ کے لیے تین رکنی پینل بنانے کی تجویز دی تھی۔

ذرائع کے مطابق پیپلز پارٹی کو خدشہ تھا کہ پینل میں شامل دو جج سپرسیڈ ہو سکتے ہیں، اور سپرسیڈ ججوں کے طریقہ کار کے حوالے سے وضاحت کی ضرورت تھی۔

ملاقات میں مسلم لیگ ن کی جانب سے اسحاق ڈار، اعظم نذیر تارڑ اور انوشہ رحمان جبکہ پیپلز پارٹی کی جانب سے شیری رحمان، فاروق ایچ نائیک، نوید قمر اور مرتضیٰ وہاب شریک تھے۔ ذرائع کے مطابق مذاکرات دو گھنٹے تک وزیر قانون کے چیمبر میں جاری رہے اور دونوں پارٹیوں کے درمیان اتفاق رائے قائم ہوا۔

اب متفقہ ترامیم ایوان میں پیش کی جائیں گی اور امید ہے کہ آئندہ اجلاس میں 27ویں آئینی ترمیم کی منظوری کا عمل شروع ہو جائے گا۔