ادبی شخصیت ڈاکٹر عارفہ سیدہ زہرا انتقال کرگئیں

پاکستان کی مشہور ادبی شخصیت اور ماہر تعلیم ڈاکٹر عارفہ سیدہ زہرا کا انتقال ہوگیا۔

 ڈاکٹر عارفہ سیدہ زہرا کی وفات کی تصدیق معروف پاکستانی ڈراما نویس، مصنف اور شاعر اصغر ندیم سید نے کی۔ انہوں نے گہرے دکھ اور افسوس کا اظہار کرتے ہوئے کہا کہ پاکستانی ادب اور تعلیم کا ایک قیمتی اثاثہ ہم سے چھن گیا ہے۔

ڈاکٹر عارفہ سیدہ زہرا کی تعلیم کا آغاز لاہور کے گورنمنٹ کالج سے ہوا، جہاں انہوں نے ایم اے اردو کی ڈگری حاصل کی۔ اس کے بعد انہوں نے دنیا کی معروف یونیورسٹی "ایسٹ ویسٹ سینٹر، یونیورسٹی آف ہوائی” سے تاریخ میں ڈاکٹریٹ کی ڈگری حاصل کی۔ ان کی تعلیمی مہارت اور گہری دلچسپی نے انہیں ملکی و غیر ملکی سطح پر ایک نمایاں شخصیت بنا دیا تھا۔

1986 سے 2009 تک ڈاکٹر عارفہ سیدہ زہرا نے گورنمنٹ کالج فار ویمن گلبرگ لاہور کی پرنسپل کے طور پر خدمات انجام دیں۔ ان کی قیادت میں ادارہ تعلیمی معیار میں بلند مقام حاصل کرنے میں کامیاب رہا۔ ان کی تعلیمی خدمات نے نہ صرف خواتین کی تعلیم کو فروغ دیا بلکہ ادارے کو بین الاقوامی سطح پر بھی متعارف کرایا۔

ڈاکٹر عارفہ سیدہ زہرا کی سب سے بڑی خصوصیت ان کی زبانوں پر عبور تھا۔ وہ سات زبانوں پر کامل دسترس رکھتی تھیں اور ان کا یہ علم ان کی تحریروں اور لیکچرز میں جھلکتا تھا۔ انہوں نے کئی تعلیمی، سماجی، انتظامی اور ثقافتی کمیٹیوں کا حصہ رہ کر اہم کردار ادا کیا۔

ان کی وفات پاکستان میں ادبی حلقوں میں گہرے غم کا باعث بنی۔ ان کی خدمات کو ہمیشہ یاد رکھا جائے گا اور ان کا علمی و ادبی کردار نسلوں تک پہنچتا رہے گا۔

صدر مملکت کا ڈاکٹر عارفہ سیدہ زہرا کے انتقال پر اظہارِ افسوس

صدر مملکت آصف زرداری کا کہنا ہے کہ ڈاکٹر عارفہ سیدہ زہرا کی وفات علمی و ادبی حلقوں کیلئے بڑا نقصان ہے، مرحومہ کی علمی خدمات، قومی زبان کے فروغ کی کاوشیں ہمیشہ یاد رکھی جائیں گی۔

صدر مملکت نے مرحومہ کے اہل خانہ، شاگردوں اور علمی برادری سے اظہار تعزیت کیا۔