مشترکہ پارلیمانی کمیٹی نے 27 ویں آئینی ترمیم کی متفقہ منظوری دے دی، مسودہ آج سینیٹ میں پیش ہوگا

پاکستان کی سینیٹ اور قومی اسمبلی کی مشترکہ پارلیمانی کمیٹی نے 27ویں آئینی ترمیم کی منظوری دے دی ہے۔ اس کے بعد اس ترمیم کو آج سینیٹ کے اجلاس میں پیش کیا جائے گا۔

مشترکہ پارلیمانی کمیٹی کا اجلاس چیئرمین فاروق ایچ نائیک کی زیر صدارت ہوا، جس میں وزیر قانون اعظم نزیر تارڑ، وزیر مملکت برائے ریلوے و خزانہ بلال اظہر کیانی، اٹارنی جنرل منصور عثمان اعوان اور پیپلزپارٹی کے نوید قمر سمیت مختلف پارلیمانی رہنماؤں نے شرکت کی۔

اجلاس میں جے یو آئی نے گزشتہ روز بائیکاٹ کیا تھا، لیکن آج ان کے رکن نے اجلاس میں شرکت کی۔ دوسری طرف پی ٹی آئی، ایم ڈبلیو ایم، پی کے میپ اور سنی اتحاد کونسل کے رہنماؤں نے اجلاس میں شرکت نہیں کی اور انہوں نے قومی اسمبلی و سینیٹ اجلاسوں کا بائیکاٹ بھی کیا۔

اجلاس دو سیشنز پر مشتمل تھا۔ پہلے سیشن میں کمیٹی اراکین نے آئین کے آرٹیکل 243 میں ترامیم کی منظوری دی۔ اس کے بعد دیگر ترامیم پر غور کیا گیا۔ اجلاس وقفے کے بعد دوبارہ دو گھنٹے تک جاری رہا۔ اس دوران کمیٹی نے 27ویں آئینی ترمیم کے مسودے کی حتمی منظوری دے دی۔ اب یہ ترمیم کمیٹی کی رپورٹ کی صورت میں ایوان بالا (سینیٹ) میں پیش کی جائے گی۔

سینیٹ اجلاس کا 45 نکاتی ایجنڈا جاری

سینیٹ کا اجلاس آج صبح 11 بجے پارلیمنٹ ہاؤس میں ہو گا، جس کا 45 نکاتی ایجنڈا جاری کردیا گیا ہے۔ اجلاس میں 27 ویں آئینی ترمیمی بل کی رپورٹ پیش کی جائے گی، سینیٹر فاروق ایچ نائیک 27ویں آئینی ترمیمی بل پر کمیٹی رپورٹ پیش کریں گے۔

سینیٹر اعظم نذیر تارڑ 27ویں آئینی ترمیمی بل کو فوری غور کے لیے پیش کریں گے، سینیٹر انوشہ رحمان پاکستان میڈیکل اینڈ ڈینٹل کونسل ایکٹ میں ترمیمی بل پیش کریں گی، اسلام آباد میٹرو بس سروس کے قیام کا بل سینیٹر سرمد علی پیش کریں گے۔

سینیٹر کامران مرتضیٰ پاکستان سائیکولوجیکل کونسل کے قیام سے متعلق بل متعارف کروائیں گے، پاکستان براڈکاسٹنگ کارپوریشن ایکٹ میں ترمیمی بل سینیٹر محمد عبدالقادر پیش کریں گے۔

 اسلام آباد میں کتابوں پر پلاسٹک کور کے استعمال پر پابندی سے متعلق بل سینیٹر شیری رحمان پیش کریں گی، اور اس کے علاوہ سیکیورٹیز اینڈ ایکسچینج کمیشن ایکٹ میں ترمیمی بل بھی ایوان میں پیش کیا جائے گا۔