فیلڈ مارشل کے عہدے کو آئینی طاقت دلوارہے ہیں، بلاول بھٹو

پاکستان پیپلزپارٹی کے چیئرمین بلاول بھٹو زرداری نے کہا ہے کہ فیلڈ مارشل کے عہدے کو آئینی طاقت دلوارہے ہیں۔

اسپیکر ایاز صادق کی صدارت ہونے والے قومی اسمبلی کے اجلاس میں بلاول بھٹو زرداری نے خطاب کرتے ہوئے کہا کہ ہم وانا اور اسلام آباد میں دہشت گردی کے واقعات کی شدید مذمت کرتے ہیں۔ قوم فتنہ الخوارج کے خلاف متحد ہے، دہشت گردوں کو پہلے بھی شکست دی، اب بھی دیں گے۔

بلاول بھٹو نے کہا کہ 27ویں آئینی ترمیم ملکی تاریخ کی ایک تاریخی کامیابی ہے، اور اس کے ذریعے آئینی عدالت کے قیام کی راہ ہموار ہو گئی ہے۔ ان کا کہنا تھا کہ 26 ویں آئینی ترمیم بھی ہم نے اتفاقِ رائے سے منظور کرائی تھی، اب 27ویں ترمیم کے ذریعے میثاقِ جمہوریت کے وعدوں کی تکمیل یقینی بنا رہے ہیں۔

چیئرمین پیپلز پارٹی نے زور دیا کہ کسی آئینی ترمیم کی مضبوطی کثرتِ رائے سے نہیں بلکہ اتفاقِ رائے سے ہوتی ہے۔ انہوں نے کہا کہ ہم نے 18ویں ترمیم کے وقت فیصلہ کیا تھا کہ ایک آئینی عدالت بنائیں گے، اور اب وہ وعدہ پورا ہونے جا رہا ہے۔ کسی کا باپ بھی 18ویں ترمیم کو ختم نہیں کر سکتا۔

بلاول بھٹو نے فیلڈ مارشل کے عہدے کو آئینی حیثیت دینے کو ایک مثبت قدم قرار دیا اور کہا کہ فیلڈ مارشل کو دنیا بھر میں سراہا جا رہا ہے۔ قوم ان کے ساتھ ہے کیونکہ وہ پاکستان کے دفاع اور استحکام کی علامت ہیں۔

انہوں نے اپوزیشن کو مخاطب کرتے ہوئے کہا کہ اپوزیشن کا کام صرف اپنے قیدیوں کی رہائی نہیں ہونا چاہیے۔ سیاسی میدان چھوڑنے کے بجائے اصولی احتجاج کیا جائے۔

چیئرمین پیپلز پارٹی نے مزید کہا کہ 27 ویں آئینی ترمیم کے بعد اب کوئی سوموٹو نہیں لے سکے گا۔ کبھی ٹماٹر، کبھی آلو کی قیمت پر سوموٹو لیا جاتا تھا، اب اس روایت کا خاتمہ ہو گیا ہے۔

بلاول بھٹو نے وفاق کی مضبوطی پر زور دیتے ہوئے کہا کہ عدالتی قتل کے فیصلوں نے وفاق کی بنیادیں ہلا دی تھیں، مگر اب وقت آ گیا ہے کہ ماضی کی غلطیوں کو درست کیا جائے۔

وزیر اعظم شہباز شریف کی کارکردگی پر بات کرتے ہوئے انہوں نے کہا کہ وزیر اعظم نہ صرف محنت کر رہے ہیں بلکہ ڈیلیور بھی کر رہے ہیں۔ اپوزیشن کو ماننا پڑے گا کہ آئینی عدالت کا قیام ایک بڑی کامیابی ہے۔

آخر میں انہوں نے کہا کہ ہم نے علیحدگی پسندوں کی سیاست کو ختم کیا ہے۔ میری اپیل ہے کہ کوئی ایسا کام نہ کیا جائے جس سے ملک دشمنوں کو طاقت ملے۔ ہم سب چاہتے ہیں کہ پاکستان معاشی مشکلات سے نکلے۔ ایف بی آر کی ناکامی صوبوں پر نہ ڈالی جائے، کیونکہ صوبوں کو اختیار دیا جائے تو وہ ایف بی آر سے زیادہ ٹیکس جمع کر سکتے ہیں۔