کیڈٹ کالج وانا کے اساتذہ اور کیڈٹس کے حوصلے بلند، دہشتگردی کے خلاف سیسہ پلائی دیوار کا عزم

ساؤتھ وزیرستان میں واقع کیڈٹ کالج وانا پر افغان خوارج کا حملہ پاک فوج کی بہادری اور بروقت کارروائی سے ناکام بنا دیا گیا۔

سیکورٹی ذرائع کے مطابق فیلڈ مارشل عاصم منیر نے لمحہ بہ لمحہ آپریشن کی نگرانی کی اور واضح ہدایت دی کہ “قوم کے یہ معمار ہمارا سرمایہ ہیں، کسی بھی صورت ان پر کوئی آنچ نہ آنے پائے۔”

آپریشن کمانڈر کرنل محمد طاہر کے مطابق 10 نومبر کی رات 5 افغان خوارج نے کیڈٹ کالج وانا پر حملہ کرنے کی کوشش کی۔ ایک خودکش حملہ آور نے دھماکہ کیا جبکہ دیگر دہشتگردوں نے گیٹ سے داخل ہونے کی کوشش کی۔ پاک فوج کے جوان فوری حرکت میں آئے اور دہشتگردوں کو مخصوص بلاک میں محدود کر دیا۔

کرنل محمد طاہر نے بتایا کہ “ہم نے پوری رات بھرپور مقابلہ کیا اور آخرکار رات ساڑھے دس بجے کے قریب تمام خوارج کو جہنم واصل کر دیا۔”

کالج کے زیر تعلیم کیڈٹس نے بتایا کہ وہ اس وقت ڈرل کمپٹیشن کی تیاری کر رہے تھے جب دھماکہ ہوا۔ ایک کیڈٹ نے کہا، “ہم جانتے تھے کہ حملہ تعلیم کے دشمنوں نے کیا ہے، جو ہمیں علم سے دور رکھنا چاہتے ہیں، مگر ہم نہیں رکیں گے۔”

اساتذہ اور سیکیورٹی فورسز نے بچوں کو بحفاظت محفوظ مقام پر منتقل کیا۔ ایک کیڈٹ نے کہا، “جب پاک فوج کے جوان پہنچے تو ہمیں مکمل اطمینان ہوا۔ الحمداللہ، ان کی بہادری نے ہمیں بچا لیا۔”

پاک فوج کے جوانوں نے 24 گھنٹے سے زائد محاصرے کے دوران کیڈٹس کے لیے ڈھال بن کر مقابلہ کیا اور اپنے لہو سے قوم کے مستقبل کو محفوظ بنایا۔