حکومت کا 27ویں آئینی ترمیمی بل میں مزید ترامیم کا فیصلہ

قومی اسمبلی کا اجلاس اسپیکر سردار ایاز صادق کی سربراہی میں شروع ہو گیا ہے، جس میں آج 27 ویں آئینی ترمیم مختلف ترامیم کے ساتھ منظور ہونے کا امکان ہے۔

ذرائع کے مطابق سینیٹ میں 27 ویں آئینی ترمیم میں تکنیکی غلطی رہ گئی تھی۔ قومی اسمبلی سے منظوری کے بعد یہ ترمیم دوبارہ سینیٹ میں بھیجی جائے گی۔ امکان ہے کہ کل سینیٹ سے ترمیم کی دوبارہ منظوری لی جائے گی۔

یاد رہے کہ دو روز قبل سینیٹ نے 27 ویں آئینی ترمیم کو دو تہائی اکثریت سے منظور کیا تھا۔ اس ترمیم کے تحت ملک میں ایک آئینی عدالت قائم کی جائے گی جس میں تمام ہائیکورٹس کے ججز شامل ہوں گے۔ صدر پاکستان کو تاحیات استثنیٰ حاصل ہوگا، جبکہ آرمی چیف کا عہدہ ختم کر کے چیف آف ڈیفنس فورسز کا نیا عہدہ تشکیل دیا جائے گا۔

گزشتہ روز وفاقی وزیر قانون اعظم نذیر تارڑ نے 27 ویں آئینی ترمیم قومی اسمبلی میں پیش کی تھی۔ اس پر حکومت اور اپوزیشن کے اراکین نے تفصیلی بحث کی تھی۔

گزشتہ روز قومی اسمبلی کے اجلاس میں مجوزہ ترمیم پر تفصیلی بحث ہوئی تھی، جو آج بھی جاری رہنے کا امکان ہے۔ حکومتی ذرائع کا کہنا ہے کہ ترمیم پر بحث مکمل ہونے کے بعد بل کی منظوری آج شام تک حاصل کر لی جائے گی۔

ذرائع کے مطابق قومی اسمبلی سے منظوری کے بعد بل کو صدرِ مملکت کو دستخط کے لیے بھیجا جائے گا۔ صدر کے دستخط کے فوراً بعد ترمیم آئینِ پاکستان کا مستقل حصہ بن جائے گی۔ اس کے بعد وفاقی آئینی عدالت کے قیام کے لیے عملی اقدامات کا آغاز کر دیا جائے گا۔

واضح رہے کہ 27ویں آئینی ترمیم کے تحت صدرِ مملکت، وزیراعظم کی ایڈوائس پر وفاقی آئینی عدالت کے ججز کا تقرر کریں گے۔ مجوزہ بل کو سینیٹ پہلے ہی منظور کر چکا ہے اور اب قومی اسمبلی سے منظوری کے بعد یہ عمل اپنے آخری مرحلے میں داخل ہو جائے گا۔