شناختی کارڈ کی فوٹو کاپی کروانے والوں کو نادرا نے خبردار کر دیا

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو خبردار کیا ہے کہ شناختی کارڈ یا دیگر دستاویزات کی غیر ضروری فوٹو کاپیاں نہ کروائیں، کیونکہ یہ عمل شناختی چوری اور ڈیٹا فراڈ کا باعث بن سکتا ہے۔

نادرا کے مطابق اکثر لوگ مختلف مقاصد کے لیے شناختی کارڈ یا ب فارم کی فوٹو کاپیاں کرواتے ہیں، لیکن یہ غفلت ان کے ذاتی ڈیٹا کے غلط استعمال کا سبب بن سکتی ہے۔ نادرا نے اپنے پیغام میں واضح کیا کہ شہری دفاتر میں صرف اصل دستاویزات دکھائیں اور بلاوجہ کاپی بنوانے سے گریز کریں۔

اتھارٹی کا کہنا ہے کہ نادرا دفاتر میں پہلے سے جاری کی گئی دستاویزات جیسے شناختی کارڈ، ایف آر سی یا ب فارم کے نمبر ہی کافی ہیں۔ اصل کاپی لانے کی ضرورت نہیں۔ تاہم دیگر اداروں سے جاری دستاویزات اگر درکار ہوں تو وہ اسکین کرنے کے بعد واپس کر دی جائیں گی۔

یاد رہے کہ 2024 میں ایک نجی ٹی وی پروگرام کی ٹیم نے لاہور میں شناختی کارڈ کی فوٹو کاپیوں کی فروخت سے متعلق سنسنی خیز انکشافات کیے تھے۔ ٹیم نے بتایا کہ بعض فوٹو اسٹیٹ دکاندار شہریوں کی شناختی دستاویزات کی اضافی کاپیاں بنا کر محفوظ رکھتے اور بعد میں پیسوں کے عوض فروخت کر دیتے ہیں۔

تحقیقات کے دوران یہ بھی سامنے آیا کہ ایسے دکاندار شناختی کارڈز کی معلومات غیر قانونی کاموں، جعلی سم رجسٹریشن یا مالی فراڈ میں استعمال ہونے والے گروہوں کو فروخت کرتے ہیں۔ اس عمل سے شہریوں کو سنگین قانونی مسائل اور ساکھ کو نقصان پہنچ سکتا ہے۔