ڈی جی آئی ایس پی آر کی کانونٹ جیسس، بیکن ہاؤس اور روٹس اسکول کے طلبا و اساتذہ کے ساتھ خصوصی نشست

راولپنڈی: ڈی جی آئی ایس پی آر نے کانونٹ جیسس اینڈ میری، بیکن ہاؤس اور روٹس اسکول سسٹم کے طلبا و طالبات اور اساتذہ کے ساتھ ایک خصوصی نشست کا انعقاد کیا۔

اس موقع پر افواج پاکستان کے آپریشنل امور اور ملکی داخلی صورتحال پر تفصیلی گفتگو کی گئی۔

پرنسپل کانونٹ جیسس اینڈ میری اسکول نے افواج پاکستان کی قربانیوں کو خراج تحسین پیش کیا۔

طلبا و اساتذہ نے بھی اپنے خیالات کا اظہار کرتے ہوئے کہا کہ یہ ایک بڑا اعزاز ہے کہ انہیں آرمی سے بات چیت کا موقع ملا۔

طلبا نے کہا کہ ہمیں اپنی مسلح افواج پر فخر ہے جو پاکستانی عوام کے لیے اپنی جانیں قربان کرنے کے لیے ہمہ وقت تیار ہیں۔

ڈی جی آئی ایس پی آر نے شرکاء کو حقائق کو درست نقطہ نظر سے دیکھنے کی تلقین کی اور سوشل میڈیا پر پھیلنے والے پروپیگنڈا، گمراہ کن اور نقصان دہ معلومات سے آگاہ کیا۔

اساتذہ نے کہا کہ آج کے سیشن میں انہوں نے سمجھا کہ ازلی دشمن کے تزویراتی اقدامات کا مؤثر مقابلہ کیسے کیا جائے اور پاک فوج کے پختہ عزم اور بہادری کو خراج تحسین پیش کیا۔

طلبا نے مزید کہا کہ ہمیں بطور ذمہ دار شہری سوشل میڈیا پر پھیلائی جانے والی غلط معلومات سے خود کو بچانا ہوگا، اور خبروں میں سچائی جاننے کے لیے تحقیق کرنا ضروری ہے۔

انہوں نے کہا کہ پاک فوج اور پاکستانی عوام نے مل کر بھارت کے خلاف ایک مضبوط اتحاد قائم کیا ہے اور ہم اچھی طرح سمجھ چکے ہیں کہ کس طرح پاک فوج ملک کو دہشت گردی سے محفوظ رکھ رہی ہے۔