ای چالان آن لائن کیسے چیک کریں؟ شہریوں کی بڑی مشکل حل ہوگئی

فیصل آباد پولیس نے شہریوں کے لیے ای چالان آن لائن چیک کرنے کا عمل آسان بنا دیا ہے۔

 ایس ایس پی سیف سٹی ملک طارق کے مطابق یہ سسٹم پہلے صرف اسمارٹ شہروں میں فعال تھا، مگر اب راولپنڈی، گوجرانوالہ اور فیصل آباد میں بھی اسے متعارف کروا دیا گیا ہے۔

ملک طارق نے شہریوں کو مشورہ دیا کہ وہ ٹریفک قوانین کی خلاف ورزی سے گریز کریں۔ بصورت دیگر بھاری جرمانے کا سامنا کرنا پڑ سکتا ہے۔ انہوں نے کہا کہ اگر سیف سٹی کے کیمرے کسی گاڑی کو سیٹ بیلٹ کے بغیر پکڑ لیں تو جرمانہ لاگو ہوگا۔ اسی طرح غیر قانونی رجسٹریشن نمبر پلیٹس والی گاڑیوں اور موٹرسائیکلوں کے لیے بھی ای چالان جاری کیا جائے گا۔

موٹرسائیکل سواروں کے لیے بھی وارننگ جاری کی گئی ہے۔ ہیلمٹ نہ پہننے پر کیمرے سے پکڑے جانے پر جرمانہ ادا کرنا ہوگا۔ ایس ایس پی سیف سٹی نے کہا کہ ہر سال ٹریفک قوانین کی خلاف ورزی کے باعث سڑکوں پر انسانی جانوں کا نقصان ہوتا ہے، اس لیے شہریوں کی حفاظت کے لیے یہ اقدامات کیے جا رہے ہیں۔

فیصل آباد کے شہری اب ای چالان آن لائن چیک کر سکتے ہیں۔ اس کے لیے سرکاری ویب سائٹ https://echallan.psca.gop.pk

پر جائیں۔ ویب سائٹ پر اپنی گاڑی یا موٹرسائیکل کا رجسٹریشن نمبر اور قومی شناختی کارڈ نمبر درج کریں اور Search پر کلک کریں۔ اگر آپ پر کوئی ای چالان جاری ہوا ہے تو اسکرین پر نظر آئے گا۔

واضح رہے کہ فیصل آباد میں سیف سٹی پراجیکٹ کے تحت ای چالان سسٹم کا باقاعدہ آغاز گزشتہ ہفتے ہوا ہے۔