افغانستان میں جن ٹھکانوں سے دہشت گردی ہوئی ہے انہیں تباہ کیا جائے گا، رانا ثناء اللہ

اسلام آباد: وزیر اعظم کے مشیر برائے سیاسی امور رانا ثنا اللہ نے کہا ہے کہ افغانستان میں جن ٹھکانوں سے دہشت گردی ہوئی ہے انہیں تباہ کیا جائے گا۔

تفصیلات کے مطابق مشیر وزیراعظم رانا ثناء اللہ نے اپنے جاری کردہ ایک بیان میں کہا کہ پاکستان کی سیاسی اور عسکری قیادت دہشت گردی کے معاملے میں مکمل یکسوئی رکھتی ہے اور افغان سرزمین سے پاکستان میں کسی بھی دہشت گرد کارروائی کا سخت جواب دیا جائے گا۔

ان کا کہنا تھا کہ دہشت گردی کرنے اور کروانے والوں کو مکمل طور پر ختم کیا جائے گا۔ انہوں نے افغان طالبان رجیم سے مطالبہ کیا کہ سرحد پر ایسا بفر زون قائم کیا جائے، جس سے بغیر چیک کسی کو پاکستان میں داخل نہ ہونے دیا جائے۔

انہوں نے صدر کے تاحیات استثنیٰ پر وضاحت کرتے ہوئے کہا کہ اگر صدر دوبارہ کوئی عہدہ نہ لیں تو انہیں تاحیات استثنیٰ دیا گیا ہے اور صدر خود اعلان کر سکتے تھے کہ انہیں یہ استثنیٰ نہیں چاہیے۔ صدر وفاق کی علامت ہیں اور ان کے پاس ایگزیکٹو اختیارات نہیں ہوتے، تمام کام وزیراعظم کی ایڈوائس پر کیے جاتے ہیں۔

رانا ثناء اللہ نے کہا کہ تجارت بند کرنے سمیت کئی آپشن زیر غور ہیں اور وقت کے ساتھ فیصلے کیے جائیں گے، افغان طالبان رجیم کو یہ سمجھنا چاہیے کہ اگر دہشت گردی جاری رہی تو تجارت ممکن نہیں ہوگی۔ دوست اور ثالث ممالک ابھی بھی مایوس نہیں ہوئے اور ان کی کوششیں جاری ہیں۔

ان کا کہنا تھا کہ اگر کوئی درمیانی راستہ نکل آئے تو اچھا ہے، ورنہ پاکستان کا فیصلہ اٹل ہوگا۔ افغانستان میں جن ٹھکانوں سے دہشت گردی ہوئی ہیں، انہیں تباہ کیا جائے گا۔

وزیر اعظم کے مشیر برائے سیاسی امور نے واضح کیا کہ اسٹریٹجک فیصلوں کا پہلے سے اعلان نہیں کیا جاتا اور بنیادی اصول یہ ہے کہ دہشت گردی کرنے اور کروانے والوں کو ختم کیا جائے گا۔ پاکستان میں امن مقدم ہے اور سیاسی و عسکری قیادت کا یہی فیصلہ ہے۔