صدر مملکت نے 27 ویں آئینی ترمیم کے بل پر دستخط کردیے

صدر مملکت نے 27 ویں آئینی ترمیم کے بل پر دستخط کردیے ہیں۔

تفصیلات کے مطابق صدر مملکت آصف علی زرداری نے 27ویں آئینی ترمیم کے بل پر دستخط کردیے، 27ویں آئینی ترمیم دونوں ایوانوں سے منظور ہوچکی، ترمیم کے بعد بل اب آئین کا حصہ بن گیا۔

اس سے قبل ایوانِ بالا میں چیئرمین سینیٹ یوسف رضا گیلانی کی زیرِ صدارت اجلاس منعقد ہوا جس میں وفاقی وزیر قانون اعظم نذیر تارڑ نے ترمیم کا نیا متن پیش کیا۔

بل کی پیشی کے ساتھ ہی ایوان میں شور شرابہ شروع ہوگیا، اپوزیشن ارکان نے ڈیسک بجا کر اور نعرے لگا کر احتجاج کیا، نعرے بازی کے دوران پی ٹی آئی کے سینیٹرز فلک ناز، فیصل جاوید اور مرزا آفریدی چیئرمین کے ڈائس کے سامنے دھرنا دیتے ہوئے بیٹھ گئے۔

اپوزیشن کی جانب سے “عدلیہ کی تباہی نامنظور” کے نعرے لگائے گئے، جس پر چیئرمین سینیٹ نے ارکان کو نعرے بازی سے باز رہنے کی ہدایت دی۔ تاہم احتجاج کے باوجود چیئرمین نے کارروائی جاری رکھتے ہوئے شق وار منظوری کا عمل مکمل کرایا۔

ترمیم کی ووٹنگ کے دوران کلاز 2 کے حق میں 64 ووٹ آئے، جب کہ مخالفت میں 4 ووٹ ڈالے گئے۔ جے یو آئی (ف) کے چار سینیٹرز نے ترمیم کے خلاف ووٹ دیا جبکہ سینیٹر سیف اللہ ابڑو اور احمد خان نے حکومت کی حمایت میں ووٹ دیا۔

ایوان میں ووٹنگ کے دوران سینیٹ ہال کے داخلی و خارجی راستے بند کر دیے گئے اور گھنٹیاں بجا کر ارکان کو ووٹنگ کے لیے طلب کیا گیا۔ نتیجتاً چیئرمین سینیٹ نے اعلان کیا کہ ترمیم کو دو تہائی اکثریت سے منظور کر لیا گیا ہے۔