اسلحہ لائسنس بنوانے کے خواہشمندوں کیلئے بڑی خبر؛ حکومت کا اہم فیصلہ

پنجاب حکومت نے صوبے میں مینوئل اسلحہ لائسنس کی کمپیوٹرائزیشن کے حوالے سے بڑا قدم اٹھایا ہے۔

 حکام کے مطابق پرانے مینوئل اسلحہ لائسنسوں کی توثیق اور انہیں کمپیوٹرائزڈ لائسنس میں تبدیل کرنے کا عمل فوری طور پر روک دیا گیا ہے۔

ترجمان محکمہ داخلہ کا کہنا ہے کہ حکومت نے شہریوں، اداروں اور سکیورٹی کمپنیوں کو پہلے ہی آخری موقع دیا تھا کہ وہ اپنے مینوئل لائسنس کمپیوٹرائزڈ کرالیں۔

 اب حکومت نے اس عمل کو مکمل طور پر بند کرنے کا فیصلہ کیا ہے۔ اس کے بعد انفرادی، ادارہ جاتی اور سیکیورٹی کمپنیوں کے لائسنس دوبارہ ویریفائی یا کمپیوٹرائز نہیں ہوں گے۔

محکمہ داخلہ نے نئے فیصلے کے تحت اسلحہ لائسنس سے متعلق تمام پرانے احکامات بھی منسوخ کر دیے ہیں۔ اسی سلسلے میں تمام ڈویژنل کمشنرز اور ایڈیشنل سیکرٹری جوڈیشل سے مارچ سے نومبر تک جاری کیے گئے کمپیوٹرائزڈ لائسنسوں کی تفصیلی رپورٹ طلب کی گئی ہے۔

حکومت نے صوبے بھر میں غیر قانونی اسلحہ جمع کرانے اور ڈی ویپنائزیشن مہم پر بھی تازہ رپورٹس مانگی ہیں۔ تمام کمشنرز اور ڈپٹی کمشنرز کو ہدایت کی گئی ہے کہ وہ 13 نومبر کی شام تک اپنی مکمل رپورٹس جمع کرائیں۔

 ذرائع کے مطابق ہر ضلع سے مارچ سے نومبر تک موصول ہونے والی درخواستوں اور جاری شدہ احکامات کی تفصیلات بھی طلب کی گئی ہیں۔

واضح رہے کہ پنجاب میں مینوئل اسلحہ لائسنسوں کو کمپیوٹرائز کرنے کا عمل 2016 میں شروع ہوا تھا، لیکن 31 دسمبر 2020 کے بعد کمپیوٹرائز نہ ہونے والے لائسنس منسوخ کر دیے گئے تھے۔ محکمے نے تازہ صورتحال کے بعد تمام متعلقہ افسران کو باضابطہ مراسلہ بھی جاری کر دیا ہے۔