ٹرین میں سفر کرنے والوں کیلئے بڑی خبر؛ پاکستان ریلوے کا اہم اعلان

پاکستان ریلوے نے لاہور سے کراچی، کوئٹہ اور راولپنڈی سمیت مختلف شہروں کو جانے والی ٹرینوں کا نیا شیڈول جاری کر دیا ہے۔

پاکستان ریلوے کی جانب سے جاری کردہ نئے شیڈول کے مطابق کچھ اہم ٹرینیں مقررہ وقت سے تاخیر کا شکار ہوں گی، جبکہ کئی ٹرینیں معمول کے مطابق چلیں گی۔

ترجمان ریلوے نے بتایا کہ قراقرم ایکسپریس 42-ڈاؤن، جو کراچی کیلئے سہ پہر 3 بجے روانہ ہونی تھی، اب 2 گھنٹے 15 منٹ کی تاخیر سے شام 5 بجکر 15 منٹ پر لاہور اسٹیشن سے روانہ ہوگی۔

اسی طرح پاک بزنس ایکسپریس 34-ڈاؤن بھی تاخیر کا شکار ہے۔ یہ ٹرین اپنے مقررہ وقت 4 بجکر 30 منٹ کے بجائے 2 گھنٹے 30 منٹ کی تاخیر سے شام 7 بجے روانہ ہوگی۔

دوسری جانب کراچی ایکسپریس 16-ڈاؤن پورے وقت پر یعنی شام 6 بجے لاہور سے روانہ ہوگی۔ شاہ حسین ایکسپریس 44-ڈاؤن کے مسافروں کو آج گرین لائن 6-ڈاؤن میں ایڈجسٹ کیا جائے گا، جبکہ گرین لائن 6-ڈاؤن کراچی کیلئے اپنے شیڈول کے مطابق رات 8 بجکر 40 منٹ پر روانہ ہوگی۔

شاہ حسین ایکسپریس کے مسافروں سے درخواست کی گئی ہے کہ گرین لائن کی روانگی سے ایک گھنٹہ پہلے اسٹیشن پہنچ جائیں تاکہ انہیں آرام سے ایڈجسٹ کیا جا سکے۔

ترجمان نے مزید بتایا کہ کراچی، کوئٹہ اور راولپنڈی جانے والی دیگر ٹرینیں معمول کے مطابق اپنی منزل کی جانب رواں دواں ہیں۔

مسافروں کو مشورہ دیا گیا ہے کہ تازہ معلومات اور رہنمائی کیلئے ریلوے انکوائری نمبر 042-117 اور 042-99070011 پر رابطہ کریں۔