ماضی میں آئین پامال کرنے والوں کی دم پر آج پیر آیا تو بیان بازی شروع ہوگئی، خواجہ آصف

اسلام آباد: وفاقی وزیر دفاع خواجہ آصف نے کہا ہے کہ ماضی میں آئین پامال کرنے والوں کی دم پر آج پیر آیا تو بیان بازی شروع ہوگئی۔

تفصیلات کے مطابق وزیر دفاع خواجہ آصف نے قومی اسمبلی میں خطاب کرتے ہوئے ماضی میں عدلیہ کے کردار پر سخت تنقید کی اور کہا کہ مخصوص لوگ آئین کی بے توقیری کرتے رہے ہیں، ماضی میں نواز شریف کو سازش کے تحت ہٹایا گیا اور بھٹو کی پھانسی میں بھی عدلیہ ملوث تھی۔

انہوں نے کہا کہ عدلیہ کا کردار انتہائی بھیانک اور سیاہ رہا، اگرچہ کہیں کہیں روشنی کی کرن نظر آئی لیکن وہ بہت کم تھی۔

ان کا کہنا تھا کہ آج بعض لوگ اپنے سابقہ گناہوں کو بھول گئے ہیں اور سپریم کورٹ پر اجارہ داری کے نام پر بیان بازی کر رہے ہیں، جسے برداشت نہیں کیا جائے گا۔

خواجہ آصف نے کہا کہ 2 ججز نے استعفیٰ دیا اور یہ ظاہر کرتا ہے کہ بعض حلقے ملک یا عدلیہ کے ساتھ نہیں بلکہ اپنے مفادات کے لیے کام کرتے ہیں۔

وفاقی وزیر دفاع کا کہنا تھا کہ جو لوگ ملک کے ساتھ غداری کرتے ہیں، ان کے ساتھ ہمدردی نہیں کی جائے گی اور ان کو فیصلہ کرنا ہوگا کہ وہ پاکستان کے ساتھ ہیں یا دہشت گردوں کے ساتھ۔

انہوں نے حالیہ کچہری میں خودکش دھماکے کے سہولت کاروں کے گرفتار ہونے کا ذکر کرتے ہوئے کہا کہ ان کے منہ سے ایک لفظ بھی مذمت کا نہیں نکلا، اور یہ ظاہر کرتا ہے کہ کچھ حلقے دہشت گردوں کو تحفظ دینے والے ہیں۔

وزیر دفاع نے یاد دلایا کہ ماضی میں 52 قوانین پاس کرنے کے لیے کئی دن لگے، جبکہ حالیہ دور میں کچھ قوانین آدھے گھنٹے میں منظور کر دیے گئے۔ عدلیہ کی انکروچمنٹ برداشت نہیں کی جائے گی اور ملک کی سلامتی اور آئین کی حفاظت سب کی ذمہ داری ہے۔

خواجہ آصف کی تقریر کے دوران اپوزیشن کی جانب سے شور شرابہ بھی ہوا، تاہم وزیر دفاع نے سخت انداز میں اپنا موقف برقرار رکھا۔